Jańalyqtar
Prezıdentti kimder qorǵaıdy?
![](https://qandastar.kz/wp-content/uploads/2024/05/IMG_5922-780x405.jpeg)
Arnaıy jasaqqa aıryqsha mindet júktelgen. Olar táýlik boıy Memleket basshysyn kúzetedi. Sóıtip, Prezıdentti kimder qorǵaıdy eken? Bul «Sardar» memlekettik kúzet qyzmetiniń arnaıy maqsattaǵy jasaǵy. Saıdyń tasyndaı jigitterden quralǵan. Olar Memleket basshysynan bastap Prezıdent bekitken azamattardyń jáne syrttan kelgen qonaqtardyń qaýipsizdigine tikeleı jaýapty. Iaǵnı sheteldik saıasatkerler men bedeldi tulǵalar el aýmaǵynda jaýyngerlerdiń qorǵaýynda bolady.
MKQ «Sardar» arnaıy maqsattaǵy jasaǵynyń jaýyngeri: – Shetel qonaqtaryn QR-nyń Memlekettik Kúzet qyzmetkerleri bizdiń Qazaqstannyń áýe keńistigine kirgennen bastap qaýipsizdigin óz qaramaǵyna alady. Quralaıdy kózge atatyn mergenderdiń de atqaratyn qyzmeti orasan. Olar Memleket basshysy baratyn aýmaqtardy aldyn ala zerttep, qaýipsizdigine kóz jetkizedi. Ár burysh, ár núkte jaýyngerlerdiń nazarynan tys qalmaıdy.
Artynsha bıik ǵımarattardyń tóbesine shyǵyp, adamdardyń qımylyn, kózqarasyn qadaǵalaıdy. Qandaı da bir kúdik týdyrarlyq jaıt baıqalsa, birden tómendegi áriptesterine habarlaıdy. Mergender amerıkalyq ári eýropalyq zamanaýı ozyq úlgidegi vıntovkalarmen qarýlanǵan. Qorǵanys kıimderiniń ózi 30 keli shamasynda. Olarǵa atyn atap, túrin kórsetýge qatań túrde tyıym salynǵan. MKQ «Sardar» arnaıy maqsattaǵy jasaǵynyń jaýyngeri: – Mergenderdiń jumysy da óte aýyr. Júrgenimizge 4 saǵat boldy. Munyń bári elimizdiń, Prezıdentimizdiń qaýipsizdigin qamtamasyz etý úshin bizdiń qyzmetkerler ter tógýde. Memlekettik Kúzet qyzmeti áskerı salanyń ishindegi eń elıtalyq kúshtik qurylym. Munda qyzmet etý ekiniń birine buıyrmaıtyn baq. Sondyqtan «Sardar» jaýyngerlerine júkteletin mindet te 2 ese aýyr. Sardar elimizdegi tańdaýly jasaqtardyń biri.
Irikteý kezinde úmitkerlerge qoıylatyn talap qatań. Boıy 180 sm-den joǵary, bilimdi, fızıkalyq daıyndyǵy myqty jigitterge basymdyq beriledi. Jáne eń kemi sport sheberligine úmitker bolýy shart. MKQ «Sardar» arnaıy maqsattaǵy jasaǵynyń jaýyngeri: – «Sardar» shabýyl tobyna 2022 jyly qabyldandym. Bul jerge qabyldaný ońaı bolǵan joq. Kóptegen synaq bar, sonyń birin tapsyryp, súrinbeı qabyldandym.
Bul jerde synaqtar kóbinese fızıkalyq turǵyda jáne IQ test. Psıholgııalyq test. Memlekettik tildi jáne bilimdi qajet etedi. Aıta keteıik, kórsetilgen jattyǵýlar tek bergi jaǵy ǵana. Negizgi taktıkalyq is-qımyldary men qoldanystaǵy qarý-jaraqtary qupııa saqtalady. Avtorlary: Mereı Qanapııa, Naýryzbaı Qurmanǵyzy