“Problemalardy jasyrmaı, ashyq aıtýymyz qajet”. Bektenov QazaqGaz basshysyna eskertý jasady

Foto:kýrsıv medıa

Premer-mınıstr Oljas Bektenov gaz salasyn damytýǵa arnalǵan Úkimet otyrysynda saladaǵy ózekti máselelerge basa nazar aýdardy, dep habarlaıdy qandastar.kz  Dalanews.kz-ke silteme jasap.

Onyń aıtýynsha, memlekettik organdar men kompanııalar tek jetistikterdi emes, problemalardy da ashyq aıtyp, olardy talqylaýǵa usynýy tıis.

“Jumystaryńyzda eshqandaı problemalyq máseleler joq pa? Jumystyń tek oń nátıjelerin ǵana kórsettińiz. Biz problemalyq máseleler týraly kóbirek aıtýymyz kerek, olardy jaryqqa shyǵaryp, talqylaýymyz qajet”, — dedi Premer-mınıstr.

Otyrys barysynda “QazaqGaz” UK” AQ basqarma tóraǵasy Sanjar Jarkeshov Qashaǵan gaz óńdeý zaýytyndaǵy jaǵdaıǵa toqtaldy. Onyń aıtýynsha, qurylys jumystarynyń baıaý júrýi saldarynan belgili bir qıyndyqtar týyndaǵan. Alaıda jańa bas merdigerdiń kelýimen bul máseleler tolyq sheshimin tapqan.

“Qazir qurylys keńeıtildi. Josparǵa saı jumystardy belgilengen merzimde aıaqtaýdy kózdep otyrmyz”, — dep atap ótti Jarkeshov.

Otyrys nátıjesinde Úkimet gaz salasyndaǵy problemalardy jasyrmaı, olardy ashyq túrde sheshý qajettigin taǵy bir márte eske saldy.