جاڭالىقتار
پروكۋراتۋرا: 5 مىڭنان استام الاياقتىق حابارلاما بۇعاتتالدى
الماتى وبلىسى پروكۋراتۋراسى ينتەرنەت-الاياقتىقتارعا قارسى ءىس-قيمىل بويىنشا ءىرى ونلاين-پلاتفورمالار (Krisha.kz, Kolesa.kz, OLX.kz) وكىلدەرىمەن بىرلەسكەن جۇمىس ناتيجەسىندە الاياقتىق ارەكەت بەلگىلەرى بار 5 مىڭنان استام اككاۋنت انىقتالىپ, بۇعاتتالدى. تاعى 7 مىڭ اككاۋنت تەكسەرۋ اياسىندا تۇر, دەپ حابارلايدى qandastar.kz.
بۇل اككاۋنتتاردىڭ باسىم بولىگى الماتى قالاسى مەن وبلىسىندا پاتەرلەردى تاۋلىكتىك جالعا بەرۋ, جىلجىمايتىن م ۇلىكتى ساتۋ, اۆتوكولىكتەردى ادەيى تومەن باعامەن ساتۋ جانە شەتەلدەن اۆتوكولىك بولشەكتەرىن جەتكىزۋ تاقىرىپتارىمەن بايلانىستى.
الاياقتار, ادەتتە, وزدەرىنە تيەسىلى ەمەس وبەكتىلەردىڭ جالعان فوتوسۋرەتتەرىن پايدالانىپ «برون» ءۇشىن الدىن الا تولەم تالاپ ەتكەن.
پروكۋراتۋرا مەن ماركەتپلەيستەردىڭ بىرلەسكەن جۇمىسى تسيفرلىق ورتاداعى قىلمىستارعا قارسى مەملەكەتتىك ورگاندار مەن جەكە سەكتور اراسىنداعى ءوزارا ءىس-قيمىلدىڭ ءتيىمدى الگوريتمىن قالىپتاستىرۋعا ىقپال ەتتى.
وبلىس پروكۋراتۋراسى تەلەكوممۋنيكاتسيالىق جانە قارجىلىق ۇيىمداردى قوسا العاندا, تسيفرلىق ەكوجۇيەنىڭ باسقا دا قاتىسۋشىلارىمەن ىنتىماقتاستىقتى كەڭەيتۋ بويىنشا جۇمىستى جالعاستىرۋدا.
