پروكۋرور ايجان ايماعانوۆا جان سىرىن اقتاردى

فوتو: اشىش دەرەككوز

حالىقتىڭ ىقىلاسىنا بولەنىپ, سۇيىكتىسىنە اينالعان ايجان ايماعانوۆا قىزىنىڭ باستاۋىش سىنىپپەن قوشتاسىپ جاتقانىن ۇزىك كادرلار ارقىلى كورسەتتى, دەپ جازدى qandastar.kz

سونىمەن قاتار انا رەتىندە بالا تاربيەسىنە ەرەكشە كوڭىل بولەتىنىن جەتكىزىپ, سىر اقپاردى:

«قىزىمنىڭ باستاۋىشپەن قوشتاسۋ كەشى بولدى — جانە بۇل سوڭعى جىلدارى قاتىسقان ساناۋلى شارالاردىڭ ءبىرى.

مەن بالامنىڭ ءاربىر ەرتەڭگىلىگىنە قاتىسىپ, سىنىپ ومىرىنە ارالاسىپ, مۇعالىمگە كومەك كورسەتەتىن انا بولمادىم. بالالارىم مەكتەپكە وزدەرى بارىپ كەلەدى, كەيدە بىرنەشە اۆتوبۋسپەن, ال كىشىسىن دايىندىقتان وزدەرى الىپ كەتەدى. مەن ولاردىڭ ءوز بەتىنشە ءبارىن يگەرىپ جۇرگەنىنە ماقتانامىن. بىراق كەيدە جانىندا بولۋ دا ماڭىزدى ەكەنىن تۇسىنەمىن.

بالالارىم مەملەكەتتىك مەكتەپتە وقيدى. كەيبىرەۋلەر تاڭعالادى, ال مەن ولاردىڭ رەاكتسياسىنا تاڭعالامىن. مەن ءۇشىن ماڭىزدىسى — قايدا وقىپ جاتقاندىعى ەمەس, سول ورتادان نە ۇيرەنىپ جاتقانى: ءبىلىم, داعدى, مىنەز.

بالالاردى قورعاۋ كۇنى قارساڭىندا تاعى ءبىر رەت وزىمىزگە ەسكەرتۋ جاساعىم كەلەدى: بالالارعا بەي-جاي قاراماڭىزدار, ولاردى تىڭدايىق, ەستيىك, جانىندا بولايىق. كۇندە بولماسا دا, شىنىمەن ولارعا ماڭىزدى ساتتەردە جانىنان مىندەتتى تۇردە تابىلايىق», — دەپ جازدى مامان.