پروكۋرورلار پەريزات قايراتقا 10 جىل, اناسىنا 8 جىل سۇرادى

پروكۋراتۋرا اتىشۋلى ىسكە نۇكتە قويۋدى تالاپ ەتتى: قايىرىمدىلىق اتىن جامىلىپ ميللياردتاعان تەڭگە جىمقىردى دەپ ايىپتالعان پەريزات قايراتقا 10 جىل باس بوستاندىعىنان ايىرۋدى سۇرادى. سونىمەن قاتار ونىڭ مۇلكىن تاركىلەۋ جانە 10 جىل بويى قايىرىمدىلىقپەن اينالىسۋعا تىيىم سالۋ جازاسىن دا بەلگىلەۋدى ءوتىندى, دەپ حابارلايدى Qandastar.kz Skifnews.kz اقپارات پورتالىنا سىلتەمە جاساپ.

ايىپتاۋشى پروكۋرور ارمان قيزىكەننىڭ ايتۋىنشا, پەريزات قايراتتىڭ كىناسىن جەڭىلدەتەتىن ەشقانداي جاعداي تابىلماعان, كەرىسىنشە, قىلمىس ەلدە توتەنشە جاعداي كەزىندە جاسالعاندىقتان اۋىرلاتاتىن ءمان-جاي رەتىندە قاراستىرىلعان.

تەرگەۋ دەرەگىنشە, پەريزات قايرات پەن ونىڭ اناسى عايني الاشباەۆا ءۇش ەپيزود بويىنشا الاياقتىق جاساعان: بالالارعا ارنالعان وڭالتۋ ورتالىعىن سالامىز, پالەستينا حالقىنا جانە سۋ تاسقىنىنان زارداپ شەككەن قازاقستاندىقتارعا كومەكتەسەمىز دەپ حالىقتان اقشا جيناعان.

پروكۋراتۋرا ولاردىڭ قايىرىمدىلىق جولىمەن جينالعان شامامەن 3,5 ميلليارد تەڭگەنى يەمدەنىپ, كەيىن زاڭداستىرعانىن مالىمدەدى.

سونداي-اق, ايىپتاۋشىلار ارمان كەزەكەن مەن مادينا ورازالينا پەريزات قايرات پەن ونىڭ اناسى گايني الاشباەۆانى اسا ءىرى كولەمدەگى الاياقتىق جانە 3,5 ملرد تەڭگەنى زاڭداستىرۋ ءىسى بويىنشا كىنالى دەپ تانۋدى سۇرادى.

پەريزات قايراتقا — 10 جىل, اناسىنا — 8 جىل باس بوستاندىعىنان ايىرۋ جازاسى سۇرالدى.

تەرگەۋ نۇسقاسى بويىنشا, ايەلدەر قايىرىمدىلىققا دەپ اقشا جيناپ, ونى جەكە قاجەتتىلىكتەرىنە جۇمساعان. ءىس ءۇش ەپيزودتان تۇرادى:

126,7 ملن تەڭگە — مۇمكىندىگى شەكتەۋلى بالالارعا ارنالعان ورتالىققا,

559 ملن تەڭگە — گازە حالقىنا كومەككە,

2,8 ملرد تەڭگە — سۋ تاسقىنىنان زارداپ شەككەندەرگە دەپ جينالعان.