پۋتين كەك قايتارادى. كرەملگە قارسى تۇركى اليانسىن كۇشەيتۋ كەرەك — ءازىربايجان ساراپشىسى

فوتو: اشىق دەرەككوز

ازەربايجان پرەزيدەنتى يلحام اليەۆ III شۋشا جاھاندىق مەديافورۋمىندا وڭتۇستىك كاۆكازدى تۇراقتىلىق پەن تىنىشتىق مەكەنىنە اينالدىرۋ كەرەك دەگەن مالىمدەمە جاسادى, دەپ جازادى qandastar.kz

اليەۆتىڭ ايتۋىنشا, بۇل ءوڭىر عاسىرلار بويى سوعىس پەن قاقتىعىستاردان كوز اشپاعان. «ەندىگى جەردە بەيبىت ءومىر سۇرەتىن كەز كەلدى», – دەدى ول.

وسى مالىمدەمەگە قاتىستى پىكىر بىلدىرگەن «اتلاس» ساياسي زەرتتەۋلەر ورتالىعىنىڭ باسشىسى, ساياسي ساراپشى ەلحان شاحينوعلۋ ازەربايجان بەيبىت ومىرگە ۇمتىلعانىمەن, كرەملدىڭ ۇستانىمى بۇعان قايشى ەكەنىن ايتتى دەپ جازادى Ertenmedia.

ساراپشىنىڭ پايىمداۋىنشا, رەسەي ءالى دە بولسا كاۆكازدا جاعدايدى ۋشىقتىرۋدى جالعاستىرىپ كەلەدى.

«بۇگىنگى كۇنى باستى سۇراق مىناۋ: كرەمل ازەربايجانعا قارسى تاعى قانداي ارانداتۋعا بارادى? ولار ءبىزدىڭ رەسەيدەگى دياسپورا وكىلدەرىمىزگە قىسىمدى كۇشەيتىپ, ءتۇرلى پروۆوكاتسياعا جول اشۋى مۇمكىن. اسىرەسە اۋىلشارۋاشىلىعى ونىمدەرىمىزدى كەرى قايتارۋ جاعدايلارى قايتادان قايتالانۋى عاجاپ ەمەس. ۋكرايناعا قارسى سوعىس اشقالى رەسەيدىڭ مەملەكەتتىك ارنالارىنىڭ شوۆينيستىك سيپاتتاعى ساراپشىلارى مەن Z-بلوگەرلەرى ازەربايجانعا قارسى ارانداتۋدى ۇدەتۋدى ۇسىنۋدا», – دەيدى شاحينوعلۋ.

ونىڭ سوزىنشە, ەگەر رەسەيدىڭ اسكەرى قاراباقتا «بىتىمگەر» رەتىندە قالسا, بۇل شىن مانىندە قاۋىپتى جاعداي بولار ەدى.

بىراق قازىرگى ۋاقىتتا رەسەي اسكەرى ازەربايجان اۋماعىنان تولىق شىعارىلعان. الايدا سولتۇستىك كورشىدەن كەلۋى ىقتيمال ارانداتۋشىلىق ارەكەتتەرگە دايىن بولۋ قاجەت دەيدى ساراپشى.

ول كرەملدىڭ قازىردىڭ وزىندە ازەربايجاندىق كاسىپكەرلەردىڭ رەسەيدەگى كاپيتالىن سالىقتىق تەكسەرىستەردى جەلەۋ ەتىپ, تارتىپ الۋى ىقتيمال ەكەنىن ايتتى.

«رەسەيدىڭ گرۋزياعا قارسى سوعىسى كەزىندە كوپتەگەن گرۋزيندى ەلدەن دەپورتاتسيالاعانى ەستە. بۇل ءادىستى ەندى رەسەيدەگى ازەربايجاندارعا قارسى قولدانۋى مۇمكىن. سول ءۇشىن بىزگە شۇعىل تۇردە اۋىلشارۋاشىلىعى ونىمدەرىمىزگە جاڭا نارىق ىزدەۋ قاجەت. سونداي-اق رەسەيدەن ەلگە قايتۋعا نيەتتى ازەربايجاندار ءۇشىن قاراباق پەن شىعىس زانگەزۋردا كاسىپكەرلىكپەن اينالىسۋعا جەڭىلدىك بەرىپ, ارنايى نەسيەلەۋدى قاراستىرۋ كەرەك», – دەيدى ساراپشى.

شاحينوعلۋ رەسەي مەن يراننىڭ كاسپي تەڭىزىندە بىرلەسكەن اسكەري جاتتىعۋ وتكىزۋ جوسپارىنان دا قاۋىپتەنەدى. ونىڭ ويىنشا, بۇل جاتتىعۋ كەزىندە ەكى ەلدىڭ اسكەري كەمەلەرى ازەربايجاننىڭ تەڭىزدەگى شەكاراسىن بۇزۋى مۇمكىن. بۇدان بولەك, رەسەيدىڭ داگەستانمەن شەكارادا قوسىمشا اسكەري كۇشتەرىن شوعىرلاندىرۋى ىقتيمال ەكەنىن جوققا شىعارمايدى.

«رەسەي بىلتىر جەلتوقسان ايىنا دەيىن ازەربايجانمەن قالىپتى قارىم-قاتىناس ۇستانىپ كەلدى. لوگيكاعا سالساق, كرەمل قازىر ازەربايجانمەن جاعدايدى شيەلەنىستىرمەۋگە ءتيىس. بىراق رەسەي باسشىلىعى قاشاننان بەرى اقىلعا قونىمدى شەشىمدەر قابىلداپ ەدى?» – دەيدى شاحينوعلۋ.

ساراپشى رەسەيدىڭ ىقتيمال ارەكەتتەرىنە جاۋاپ رەتىندە ازەربايجاننىڭ تۇركيا جانە ورتالىق ازياداعى تۇركى مەملەكەتتەرىمەن اسكەري جاتتىعۋلار سانىن ارتتىرۋعا كەڭەس بەردى. ونىڭ پىكىرىنشە, بۇل سولتۇستىك باعىتتان تونەتىن قاۋىپتىڭ الدىن الۋعا مۇمكىندىك بەرەدى.