جاڭالىقتار
پۋتين ۋكرايناعا ەشقانداي شارتسىز تىكەلەي كەلىسسوزدەر وتكىزۋدى ۇسىندى
فوتو: ربك
رەسەي فەدەراتسياسىنىڭ پرەزيدەنتى ۆلاديمير پۋتين ۋكرايناعا ەشقانداي شارت قويماستان تىكەلەي كەلىسسوزدەر جۇرگىزۋدى ۇسىندى. بۇل تۋرالى qandastar.kz سايتى ربك پورتالىنا سىلتەمە جاساپ حابارلايدى.
ءپۋتيننىڭ ايتۋىنشا, رەسەي مۇنداي ديالوگتى 15 مامىردا-اق ىستامبۇلدا باستاۋعا دايىن.
«پرەزيدەنت ەردوعانمەن سويلەسەمىز دەپ جوسپارلاپ وتىرمىز. ودان وسى كەلىسسوزدەردى وتكىزۋ مۇمكىندىگىن سۇرايمىن», – دەدى رەسەي كوشباسشىسى.
سونداي-اق پۋتين ۋكراينا مەن ەۋروپا ەلدەرىنىڭ 30 كۇندىك ءبىتىم تۋرالى ۇسىنىسىنان باس تارتىپ, ۋلتيماتۋمدى قابىلداماعانىن جانە ءوز شارتتارىن قويعانىن ايتتى.
ء«بىزدىڭ ۇسىنىستارىمىز ۇستەلدە جاتىر, شەشىمدى ۋكراينا مەن ولاردىڭ ەۋروپالىق كۋراتورلارى قابىلداۋى كەرەك», – دەدى ول.
بۇدان بولەك رەسەي ءۇش كۇندىك مامىر ءبىتىمىن كيەۆتىڭ ارەكەتىنە قاراي ۇزارتۋدى جوققا شىعارمايتىنىن مالىمدەدى.
مالىمدەمە الەمدىك بۇقارالىق اقپارات قۇرالدارىن دۇرلىكتىردى. Stan.kz تانىمال باسىلىمداردىڭ كەيبىرەۋىنىڭ رەاكتسياسىن جينادى. NBC پۋتين قولدانعان تۇجىرىمدار ونىڭ «ۇزاق مەرزىمدى سالدارى بولاتىنىن, سونىڭ ىشىندە تۇراقتى بەيبىتشىلىككە باعىتتالعان ماڭىزدى كەلىسسوزدەر جۇرگىزۋگە نيەتى بار ەكەنىن» كورسەتەدى دەپ ەسەپتەيدى. Guardianرەسەي باسشىسىنىڭ ۇندەۋىن «ەۋروپالىق كوشباسشىلاردىڭ 30 كۇندىك ءبىتىم تۋرالى ۋلتيماتۋمىنا رەسەيدىڭ جاۋابى» دەپ سيپاتتادى.
ال Reuters اگەنتتىگى ءپۋتيننىڭ «جاڭا ءبىتىم نەمەسە اتىستى توقتاتۋ تۋرالى كەلىسىمدەر» مۇمكىندىگىن جوققا شىعارمايتىنىن اتاپ ءوتتى. بىراق مۇنداي كەلىسىم «تۇراقتى بەيبىتشىلىككە» باستار العاشقى قادام بولۋى كەرەك ەكەنىن جەتكىزدى.
GB News بولسا رەسەي پرەزيدەنتىنىڭ مالىمدەمەسىن ماڭىزدى وقيعا دەپ باعالاپ, ونىڭ ۋكراينامەن ىقتيمال كەلىسسوزدەرگە «نەگىز قالاعانىن» جازدى. The Sun باسىلىمى دا پۋتين «كەلىسسوزدەرگە جول اشتى» دەپ مالىمدەدى.
Washington Examinerباسىلىمىنىڭ پىكىرىنشە, ءپۋتيننىڭ ءسوزى «اتىستى توقتاتۋعا يشارا جاسادى» دەپ بولجايدى. ال يسپانيالىق Vanguardiaگازەتى پۋتين «30 كۇندىك ءبىتىمدى اشىق تۇردە قابىلداعان جوق» دەپ اتاپ ءوتتى. بۇل پىكىردىEl Mundo باسىلىمى دا قۋاتتايدى. باق وكىلى رەسەي پرەزيدەنتى ەۋروپالىق ۇسىنىسقا ناقتى جاۋاپ بەرمەدى دەپ ەسەپتەيدى.
