پىشاقتار مەن ۇيىقتاتاتىن دارىلەر تابىلعان: الماتىدا شاتىردان قۇلاعان قىزداردىڭ ولىمىنە قاتىستى كۋاگەرلەر جاڭا دەرەكتەردى ءبولىستى

فوتو: اشىق دەرەككوز

الماتىدا 7-سىنىپ وقۋشىسى سەگىزىنشى قاباتتان قۇلاپ قازا تاپقان وقيعانىڭ كۋاگەرلەرى جاڭا دەرەكتەردى ءبولىستى. بۇل تۋرالى qandastar.kz كتك تەلەارناسىنا سىلتەمە جاساپ حابارلايدى.

تۇرعىندار جەتكىنشەكتەر سەكىرىپ كەتكەن جەردەن ادامنىڭ بۇلشىق ەتىن بوساتىپ, ۇيىقتاتاتىن اسەرى بار بىرنەشە ءدارى تاۋىپ العان. قازىر وقيعاعا قاتىستى پوليتسيا تەرگەۋ جۇرگىزىپ جاتىر. ازىرگە بەلگىلىسى ەكى وقۋشى ساباق ورتاسىندا مەكتەپتەن شىعىپ كەتكەن ەكەن.

توعىز قاباتتى تۇرعىن ءۇي قازىر قۇقىق قورعاۋ ورگاندارىنىڭ ەرەكشە باقىلاۋىندا. مەكتەپ فورماسىن كيگەن ەكى قىز ءۇيدىڭ بەينەباقىلاۋ كامەراسىنا ءتۇسىپ قالعان. تاڭعى ساعات 10 شاماسىندا جاسوسپىرىمدەر كوتەرىڭكى كوڭىل-كۇيمەن پودەزدەردىڭ بىرىنە كىرىپ كەتكەن.

“بىرەۋىنىڭ بەتى تومەن قاراپ جاتتى. ەكىنشىسى بىلاي. مەن ولاردى تانىمايمىن. 25 مەكتەپتەن دەيدى. بىرەۋى كۇرتە كيگەن, ەكىنشىسى ريۋكزاكپەن بولدى”,  – دەيدى وقيعا كۋاگەرى گالينا ۆاسيلەۆا.

كۋاگەرلەردىڭ ايتۋىنشا, قىزدار شاتىردا جارتى ساعاتتاي بولعان. قايعىلى جاعدايدان كەيىن تۇرعىندار شاتىردان بەلگىسىز پرەپاراتتاردى تاۋىپ العان.

“ۇيىقتاتاتىن دارىلەر, پىشاقتار, اياق كيىمدەر بار. قىسقاسى, قىزدار دايىندالىپ كەلگەن. ونىڭ ۇستىنە ولار قۇلاعان كەزدە ەشكىم ايقايلاعان جوق. تۇسىنەسىز بە? ولار بىردەڭە تۇتىنعان”, – دەيدى وقيعا كۋاگەرى.

بۇل ۋاقىتتا وقۋشى قىزداردىڭ نەلىكتەن ساباقتا بولماعانى ازىرگە بەلگىسىز. قىزدار وقيتىن گيمنازيا اكىمشىلىگى تۇسىنىكتەمە بەرۋدەن باس تارتتى. ال قالالىق ءبىلىم باسقارماسى مەكتەپتە تەكسەرىس جۇرگىزىپ جاتىر, ارنايى كوميسسيا قۇرىلعان.

“بۇگىن المالى اۋدانىندا ەكى قىزدىڭ ءومىرىن قيعان قايعىلى وقيعاعا بايلانىستى الماتى قالالىق ءبىلىم باسقارماسى ءىستىڭ بارلىق ءمان-جايىن زەردەلەۋ ءۇشىن ءتيىستى مەملەكەتتىك ورگانداردىڭ قىزمەتكەرلەرىن تارتۋ ارقىلى كوميسسيا قۇردى”, – دەدى الماتى قالالىق ءبىلىم باسقارماسىنىڭ باسشىسى سايران سايفەدەنوۆ.

سونداي-اق الماتىداعى بارلىق تۇرعىن ۇيلەردىڭ شاتىرلارى مەن شاتىرلارعا كىرۋ جولدارى تەكسەرىلەتىن بولادى.

“المالى اۋدانى پوليتسيا باسقارماسى قىلمىستىق ءىس قوزعادى. وقيعانىڭ سەبەپ-سالدارى مەن ءمان-جايى انىقتالىپ جاتىر”, – دەدى الماتى پد رەسمي وكىلى سالتانات ازىربەك.

ەسكە سالساق, بۇعان دەيىن الماتىدا ەكى وقۋشى قىز توعىزىنشى قاباتتان قۇلاپ مەرت بولعانى تۋرالى جازعان ەدىك.