«Qasqa Jol»: ازاماتتاردىڭ جەكە مالىمەتتەرىن قورعاۋ جانە نەسيە الۋ جۇيەسى بويىنشا زاڭ اقساپ تۇر

قر پارلامەنتى ءماجىلىسىنىڭ دەپۋتاتى ۋنزيلا شاپاققىزى مەن الاياقتاردان زارداپ شەككەن جاندارعا كومەك قولىن سوزىپ جۇرگەن اناربەك مارقاباي «Qasqa Jol» Youtube ارناسىندا قوناقتا بولىپ, سوڭعى كەزدەگى وزەكتى ماسەلەمەن وي ءبولىستى, دەپ حابارلايدى qandastar.kz

اناربەك مارقاباي وسىدان بىرنەشە ۋاقىت بۇرىن الاياقتارعا الدانىپ, اتىنان 16 ميلليون تەڭگەگە ونلاين تۇردە نەسيە راسىمدەلىپ سان سوعىپ قالعان. ول ەلىمىزدەگى ازاماتتاردىڭ جەكە مالىمەتتەردى قورعاۋ بويىنشا جانە نەسيە الۋ جۇيەسى بويىنشا زاڭنىڭ اقساپ تۇرعانىن ايتتى.

ء«بىزدىڭ مەملەكەتتە بۇل سالانىڭ اقساپ جاتقان تۇستارى وتە كوپ. كورىنىپ تۇر. مىسالى, ونلاين كرەديت ارينە, جاقسى. شەتەلدە جۇرسەڭ دە قاشىقتىقتان نەسيە الا الاسىڭ. بىراق, ەكىنشى جاعى تاعى بار. قورعانىس قابىلەتى. بۇل قىلمىس اقپاراتتىق جۇيەدە بولادى. بۇنى كەز كەلگەن تەرگەۋشى تەكسەرە المايدى. IT مامانى كەرەك. ال وندايعا IT ماماندارىن وقىتپايدى. قازىر ۇكىمەتكە سەنۋ مۇمكىن ەمەس. بانكتەردىڭ وزىندە ءسىز نەسيەنى 1 جىلعا الساڭىز دا, ءسىزدىڭ مالىمەتتەرىڭىز ساقتالىپ تۇرادى. ۇكىمەت ءبىزدىڭ جەكە مالىمەتتەرىمىزدى جەتكىلىكتى دەڭگەيدە قورعاپ جاتقان جوق. مەنىڭ رۇقساتىمسىز بانكتەردىڭ نەسيە بەرۋىڭىنىڭ ءوزى ۇلكەن زاڭ بۇزۋشىلىق. قورعانىس ساپاسى تومەن دەڭگەيدە. كۇدىكتى ارەكەتتەر جاسالسا ءسىزدىڭ اتىڭىزدان وندا كرەديت توقتاۋ كەرەك» , — دەدى ول.

وسى ورايدا بۇل پىكىردى ءماجىلىس دەپۋتاتى دا قولدادى.

ء«يا, ءبىز جان-جاقتى جۇمىس جاساعانىمىزبەن جاڭا دۇنيەلەر شىعىپ جاتادى. ءبىز زاڭ شىعارۋشى ورگان رەتىندە ىلەسە الماي قالىپ جاتامىز. جاڭا زاڭ شىعارعاندا دا ونىڭ ەكى جاعى بار. ونلاين نەسيە راسىمدەۋگە تىيىم سالساق, ءبىراز ۋاقىتتان سوڭ ازاماتتار حابارلاسىپ قايتا ىسكە قوسۋىمىزدى سۇرايدى. ودان سوڭ بيومەتريانى دا ەنگىزدىك. وعان قوسا سۋىتۋ جۇيەسىنە بايلانىستى دا زاڭ شىعاردىق. نەسيەگە ءوتىنىش بەرگەن سوڭ 24 ساعاتتان كەيىن عانا ءسىزدىڭ رۇقساتىڭىزبەن راسىمدەلەدى. قازىر الاياقتىق فاكتىسى بويىنشا پوليتسياعا جۇگىنسەڭىز, ءىس قارالىپ سوتتىڭ شەشىمى شىققانعا دەيىن بارلىق نەسيەلىك تولەمدەر توقتاتىلادى. شوتىڭىزداعى بۇعاتتاۋلار شەشىلەدى. ءوزىڭىز كىنالى بولساڭىز, وندا امال جوق كرەديتتى تولەۋگە تۋرا كەلەدى. ال الاياقتاردىڭ قىلمىسى انىقتالسا وندا نەسيەڭىز كەشىرىلەدى. نەسيە تاريحىڭىز جاڭارادى», — دەدى.