جاڭالىقتار
Qazaq Air اۋە كومپانياسىنىڭ اتاۋى وزگەرەدى
فوتو: qazaqair.com
قازاقستانداعى Qazaq Air كومپانياسى نىڭ اتاۋى ەندى VietJet Kazakhstan دەپ اتالماق. بۇعان دەيڭن كومپانيانىڭ اكتسياسىن ينۆەستور Sovico Group ساتىپ العان بولاتىر, دەپ حابارلايدى qandastar.kz سايتى.
بۇگىن استانادا ءوتىپ جاتقان دوڭگەلەك ۇستەلدە قازاقستان – ۆەتنام تاراپى وسىنداي كەلىسىمگە قول قويدى.
«كەلىسىم كەشەندى جەكەشەلەندىرۋ جوسپارىنىڭ اياسىندا جاسالدى. ساتىپ الۋشى — Sovico Group كومپانياسى. كەلىسىمنىڭ بارلىق شارتتارى ورنىدالدى, تولەم الىندى, اكتسيالارى ينۆەستوردىڭ دەربەس شوتىنا بەرىلدى», — دەدى «سامۇرىق-قازىنا» اق باسقارما توراعاسى نۇرلان جاقىپوۆ.
بۇل سەرىكتەستىك قازاقستان مەن ۆەتنام اراسىنداعى ەكونوميكالىق بايلانىستى نىعايتادى. 2024 جىلدىڭ مامىرىندا ۆەتنامنىڭ Sovico Group حولدينگى Qazaq Air كومپانياسىن ساتىپ الۋعا نيەتتى ەكەنى بەلگىلى بولعان. جەلتوقساندا «سامۇرىق – قازىنا» اق ينۆەستورلار كونسورتسيۋمىمەن Qazaq Air اكتسيالارىن ساتۋ – ساتىپ الۋ كەلىسىمشارتىنا قول قويىلعانىن حابارلادى. ينۆەستور اۋە كومپانياسىن دامىتادى. الداعى بىرنەشە جىلدا Boeing 737 Max نەمەسە Airbus A321 ماركالى 20 ۇشاق قوسپاق.
