قارجى جانە تولەمدەر
QazExpoCongress قارجىلىق ەسەبى اشىق جۇرگىزىلەدى
فوتو: اشىق دەرەككوز
قر جوعارى اۋديتورلىق پالاتاسىنىڭ نۇسقاماسى بويىنشا «QazExpoCongress» ۇك» اق-نىڭ كورپوراتيۆتىك ەسەپ ساياساتىنا وزگەرىس پەن تولىقتىرۋ ەنگىزىلدى. ولار ۇلتتىق كومپانيا قىزمەتىنىڭ اشىقتىعى مەن تيىمدىلىگىن ارتتىرۋعا باعىتتالعان, دەپ جازدى qandastar.kz
جۇرگىزىلگەن مەملەكەتتىك اۋديت بارىسىندا QazExpoCongress-تە اكتيۆتەردى ەسەپكە الۋ نەتتو-نەگىزدە (سۋبسيديالاردى قوسپاي) جۇزەگە اسىرىلاتىنى انىقتالدى. بۇل مەملەكەتتىك سۋبسيديالاردىڭ قوزعالىسى مەن ونى پايدالانۋدىڭ ناتيجەلىلىگىن باقىلاۋعا مۇمكىندىك بەرمەيدى. وسىنداي قاراجات ەسەبىنەن ساتىپ الىنعان نەگىزگى قۇرالدار ۇلتتىق كومپانيانىڭ قارجىلىق ەسەپتىلىگىندە كورسەتىلمەگەن.
جاعدايدى تۇزەتۋ ءۇشىن «QazExpoCongress» ۇك» اق ديرەكتورلار كەڭەسىنە كورپوراتيۆتىك ەسەپ ساياساتىن قايتا قاراۋ تاپسىرىلدى.
ناتيجەسىندە, بيىل 28 قاڭتاردا سۋبسيديالار ەسەبىن برۋتتو-نەگىزگە اۋداراتىن وزگەرىستەر بەكىتىلدى. بۇل ۇلتتىق كومپانيانىڭ قارجىلىق جاعدايىن دالىرەك كورسەتۋگە, مەملەكەت قاراجاتىنىڭ پايدالانىلۋىن تيىمدىرەك باقىلاۋعا جانە ۇلتتىق كومپانيانىڭ شىعىستارىن وڭتايلاندىرۋ بويىنشا جۇرگىزىلىپ جاتقان جۇمىستىڭ اشىقتىعىن ارتتىرۋعا مۇمكىندىك بەرەدى.
وتكەن جىلدىڭ اقپان ايىندا ۇكىمەتتىڭ كەڭەيتىلگەن وتىرىسىندا سويلەگەن سوزىندە مەملەكەت باسشىسى قاسىم-جومارت توقاەۆ كۆازيمەملەكەتتىك سەكتوردا ەلەۋلى رەفورمالار جۇرگىزىلەتىنىن باسا ايتتى.
«ۇلتتىق كومپانيالاردى IPO-عا شىعارۋ ماسەلەسىن قايتا قاراۋ وتە ماڭىزدى. بۇل ىستە نەگىزگى ماقسات – مەملەكەتتىك اكتيۆتەردىڭ تيىمدىلىگىن ارتتىرۋ. كورپوراتيۆتىك باسقارۋدىڭ زاماناۋي ءادىس-تاسىلدەرىن ەنگىزۋ قاجەت. سول ارقىلى كومپانيالاردىڭ بارىنشا اشىق قىزمەت ەتۋىن قامتاماسىز ەتۋگە بولادى», — دەدى قر پرەزيدەنتى.
