«رەالعا» جاڭا باپكەر كەلمەك

مادريدتىك «رەالدىڭ» اڭىز ويىنشىسى, سوڭعى جىلدارداعى ەڭ تابىستى باپكەرلەردىڭ ءبىرى حابي الونسو سانتياگو بەرنابەۋگە قايتا ورالادى. الايدا بۇل جولى ويىنشى ەمەس, باس باپكەر رەتىندە, دەپ جازادى qandastar.kz سايتى inbusiness.kz-كە سىلتەمە جاساپ. 

بۇل تۋرالى سەنىمدى اقپارات كوزى فابريتسيو رومانو مالىمدەدى. ونىڭ ايتۋىنشا, الونسو مەن مادريدتىك كلۋب اراسىنداعى كەلىسىمشارت 2028 جىلدىڭ جازىنا دەيىن جاسالعان. قارجىلىق مالىمەتتەر ازىرگە قۇپيا ساقتالۋدا.

كارلو انچەلوتتي ءداۋىرى اياقتالۋعا جاقىن. جىلدار بويى كلۋبتىڭ ىشكى ءتارتىبىن ساقتاپ, «رەالعا» بىرنەشە مارتە چەمپيوندار ليگاسىن سىيلاعان يتاليالىق مامانمەن قوشتاساتىن ءسات تە الىس ەمەس.

الايدا كوماندانىڭ تىزگىنىن ءوز داۋىرىندە مادريدتىك ۇجىمدا ويناعان, كلۋبتىڭ تىنىس-تىرشىلىگىن ىشتەن بىلەتىن الونسوعا بەرۋ – كلۋبتىڭ بولاشاعى ءۇشىن جاسالعان سەنىمدى قادام. حابي الونسو 1 ماۋسىمنان باستاپ قىزمەتىنە رەسمي كىرىسىپ, اقش-تا وتەتىن كلۋبتىق الەم چەمپيوناتىندا (15 ماۋسىم – 13 شىلدە) باپكەر رەتىندە العاشقى ماتچىنا شىعادى.

ونىڭ سوڭعى جۇمىس ورنى گەرمانيانىڭ «بايەر» كلۋبى فۋتبول الەمىن تاڭعالدىرعان. الونسونىڭ جەتەكشىلىگىمەن «بايەر» العاش رەت بۋندەسليگانى جەڭىپ, ەل كۋبوگىن يەلەنىپ, ەۋروپا ليگاسىنىڭ فينالىنا دەيىن جەتتى. ەڭ باستىسى – كوماندا ءبىر ماۋسىمدا بىردە-ءبىر جەڭىلىسسىز رەكورد ورناتتى.

ال «رەالدى» وسى ۋاقىتقا دەيىن باسقارعان انچەلوتتيدىڭ ەسىمى ءجيى-ءجيى برازيليا قۇراماسىمەن بايلانىستىرىلۋدا. ماۋسىم سوڭىندا ول ۇلتتىق قۇراما تىزگىنىن ۇستاۋى مۇمكىن دەگەن بولجامدار كۇشەيىپ كەلەدى.

حابي الونسونىڭ «رەالداعى» جاڭا ءداۋىرى باستالدى. ونىڭ تاكتيكالىق شەبەرلىگى, ويىنعا دەگەن كوزقاراسى مەن كلۋبقا دەگەن ادالدىعى جاڭا جەتىستىكتەرگە جول اشارى ءسوزسىز. مادريدتە ۇلكەن ءۇمىت پەن جاڭا تاريحتىڭ العاشقى پاراعى جازىلۋعا دايىن.