رەسەي ءباسپاسوزى اشىقتان اشىق قازاقستانعا اەس-ءتى روساتوم سالۋى كەرەك دەگەندى ايتا باستادى

كوللاج Ulysmedia.kz

قازاقستاندا اەس بويىنشا جالپىۇلتتىق رەفەرەندۋمنىڭ تۇپكىلىكتى ناتيجەسى شىقپاي جاتىپ رەسەي مەدياسى قازاقستانعا اەس-ءتى روساتوم سالادى دەگەن اقپارات تاراتىپ جاتىر, دەپ حابارلايدى qandastar.kz Ulysmedia.kz سىلتەمە جاساپ.

رەسەيلىك مەدياداعى ماتەريال

ماسەلەن, Absatz.media دەپ اتالاتىن رەسۋرس «ەكسپەرت: قازاقستان اەس قۇرىلىسىنا مەردىگەر رەتىندە روساتومدى تاڭدايدى» دەگەن ماتەريال شىعارعان.

ەكسپەرت دەپ وتىرعانى جاڭا قوعام ينستيتۋتىنىڭ ديرەكتورى, ساياساتتانۋشى دەلىنگەن ۆاسيلي كولتاشوۆ ەسىمدى ادام.

ونىڭ سوزىنشە, روساتوم پايداسىنا جاسالعان تاڭداۋ قازاقستانعا باتىسقا تاۋەلدى بولماۋعا, ارزان ەنەرگيا الۋعا مۇمكىندىك بەرەدى.

ول قازاقستان امەريكالىق Westinghouse كومپانياسىن تاڭداسا, الداعى ۋاقىتتا ەلەۋلى ساياسي قيىندىقتارعا تاپ بولادى, رەسەي مۇنى جاقسى قابىلدامايدى دەپ سانايدى.

«قازاقستان ءىرى ۋران قورى بار مەملەكەت, ەلگە امەريكالىقتاردىڭ نەمەسە فرانتسۋزداردىڭ كىرۋى, ەلدىڭ تىنىش ەكونوميكالىق دامۋى مەن كورشى ەلدەرمەن, ءبىرىنشى كەزەكتە رەسەي جانە قىتايمەن قاجەتتى ەكونوميكالىق ينتەگراتسيا جاساۋى مۇمكىن بولماي قالادى. ەرتە مە, كەش پە, ءبارى وتكىر سىرتقى ساياسي كونفليكتكە ۇلاسادى» دەيدى كولتاشوۆ.

باسىلىم ماتەريالىنىڭ سوڭىنا روساتوم كورپوراتسياسىنىڭ ديرەكتورى الەكسەي ليحاچەۆتىڭ «ەگەر ۋكراينا قارۋلى كۇشتەرى كۋرس اەس-ىندەگى رەاكتورعا سوققى جاساسا, چەرنوبىلدەگى اپات تۇك بولماي قالادى» دەپ ايتقان ءسوزىن كەلتىرگەن. بۇل ءسوزدى ءدال وسى كونتەكسكە نەگە قىستىرعانىن ءتۇسىنۋ قيىن. «روساتومعا سالدىرماساڭدار, چەرنوبىلدەن دە الاپات اپاتقا تاپ بولاسىڭدار» دەگەن قوقان-لوقى ما تۇسىنىكسىز.

ۇكىمەت شورت-ءليسى

ۇكىمەت اەس سالۋ ماسەلەسىندە 4 ەل – كورەيا, رەسەي, قىتاي, فرانتسيا ەلدەرىنىڭ تەحنولوگيالارىن زەردەلەپ جاتقانىن حابارلاعان.

توقاەۆ نە دەيدى

رەفەرەندۋمدا داۋىس بەرگەن كەزىندە ەل پرەزيدەنتى «اەس-ءتى قاي ەل سالادى» دەگەن سۇراققا ۇكىمەت ماسەلە بويىنشا ناقتى تالداۋ جاساپ, كەلىسسوزدەر جۇرگىزۋ كەرەك ەكەنىن اتاپ وتكەن.

ۇكىمەت ساراپتاما جاساپ, ءتيىستى كەلىسسوزدەر جۇرگىزۋى قاجەت. مەنىڭ جەكە پىكىرىم بويىنشا, قازاقستاندا ەڭ وزىق تەحنولوگيالاردى قولداناتىن الەمدىك دەڭگەيدەگى كومپانيالاردى بىرىكتىرەتىن حالىقارالىق كونسالتينگتىك توپ جۇمىس ىستەۋى كەرەك, – دەگەن توقاەۆ.