رەسەي ءبىر تۇندە ۋكرايناعا 500-گە جۋىق درون مەن ون شاقتى زىمىران ۇشىرعان

فوتو: چەركاسس وبلىستىق تجد

ۋكراينا قارۋلى كۇشتەرىنىڭ وكىلدەرى 29 ماۋسىم جاپپاي اۋە شابۋىلى جاسالعانىن مالىمدەدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ۋكراينا اسكەري-اۋە كۇشتەرى قولباسشىلىعىنىڭ مالىمەتى بويىنشا, رەسەي جەكسەنبىگە قاراعان ءتۇنى 477 ۇشقىشسىز ۇشاقتى ۇشىرعان. سونىمەن قاتار جەردەگى نىساندارعا سوققى بەرۋ ءۇشىن دە قولداناتىن 46 قاناتتى زىمىران, جەتى «يسكاندەر» بالليستيكالىق زىمىرانى, ءتورت «كينجال» اەروبالليستيكالىق زىمىرانى جانە ءۇش S-300 زەنيتتىك زىمىرانى ۇشىرىلعانى حابارلاندى.

ۇشقىشسىز ۇشاقتار مەن قاناتتى زىمىرانداردىڭ جارتىسىنا جۋىعى تۇسىرىلگەن, 225 ۇشقىشسىز ۇشاقتىڭ نىساناسىنان اۋىتقىپ كەتكەن جانە بالليستيكالىق زىمىرانداردىڭ ءبىرى دە تۇسىرىلگەن.

بۇل جولعى سوققىلاردان جاپپاي قازا تاپقاندار تۋرالى اقپارات جوق. شابۋىل ۋكراينانىڭ لۆوۆ, پولتاۆا, چەركاسسى, نيكولاەۆ جانە زاپوروجە وبلىستارىن قامتىدى.

ۋكراينا قارۋلى كۇشتەرى دە F-16 ۇشاعىنىڭ جوعالعانى جانە اۋە شابۋىلىنا تويتارىس بەرگەن ۇشقىشىنىڭ قازا تاپقانى تۋرالى حابارلادى.

ۋكراينا پرەزيدەنتى ۆلاديمير زەلەنسكي تۇنگى شابۋىلعا قاتىستى پىكىر ءبىلدىردى.

«سوعىستى توقتاتۋ كەرەك, اگرەسسورعا قىسىم جاساۋ كەرەك, بىزگە قورعانىس كەرەك. بالليستيكادان, زىمىران مەن ۇشقىشسىز ۇشاقتاردان, تەرروردان ۋكراينا اۋە قورعانىسىن كۇشەيتۋى كەرەك. قورعايتىن نارسە بۇل – بىز ساتىپ الۋعا دايىن امەريكالىق جۇيەلەر», – دەدى زەلەنسكي.

ەسكە سالساق, رەسەي ۋكراينانىڭ ودەسسا قالاسىنا شابۋىل جاساعانى ايتىلدى.