Reseı qarýly kúshteri Ýkraına qalalaryna áýe soqqysyn jasap, saldarynan 28 adam qaza tapty

Foto: Egemen.kz

Reseı qarýly kúshteri Ýkraına qalalaryna áýe soqqysyn jasap, saldarynan 28 adam mert boldy. Taǵy 100-den asa adam jaraqat aldy. Bul týraly Stan.kz aqparat agenttigi habarlaıdy.

Dúısenbidegi shabýyldan 28 adam kóz jumyp, 112 adam jaraqat aldy. Áýe soqqysynan Kıevtegi «Ohmatdet» balalar aýrýhanasy zardap shekti. Shabýyl kezinde aýrýhanada eki ota jasalyp jatqan.

Ýkraına bıligi beıbit turǵyndarǵa jasalǵan áýe shabýylyna baılanysty BUU qaýipsizdik keńesiniń otyrysyn shaqyrmaq. Al qarýly kúshter balalar aýrýhanasyna jasalǵan soqqyny áskerı qylmys retinde tirkep, is qozǵaǵan.

Al Reseı qorǵanys mınıstrligi «qasaqana azamattyq nysandarǵa shabýyl jasaǵany týraly aqparattyń shyndyqqa janaspaıtynyn» málimdedi.

Ýkraına tótenshe jaǵdaılar qyzmetiniń málimetinshe Kıevte 17 adam kóz jumyp, 50 adam jaraqat aldy. Al Dnepropetrovsk oblysynda 11 adam kóz jumyp, taǵy 62 adam jaraqat aldy.