رەسەي ءۇشىن سوعىسقان قازاقستاندىق ەر ادام پۋتيننەن ازاماتتىق بەرۋدى سۇرادى

فوتو: سكرين ۆيدەو

قازاقستاندىق پەتر ميروشنيچەنكو ۋكرايناعا قارسى سوعىسقا قاتىسقانى ءۇشىن ەلگە قايتا الماي ءجۇر. ول ەندى پرەزيدەنت ۆلاديمير پۋتينتەن رەسەي ازاماتتىعىن بەرۋدى سۇرادى. بۇل تۋرالى qandastar.kz حابارلايدى.

اقمولا وبلىسىنىڭ 41 جاستاعى تۇرعىنى پەتر ميروشنيچەنكو ەكى جىل بۇرىن رەسەي جاعىندا كەلىسىمشارت بويىنشا سوعىسۋ ءۇشىن ۆلاديمير قالاسىنا كەلگەن. 2023 جىلى جەلتوقساندا ونىڭ قۇجاتتارىنىڭ مەرزىمى بىتكەندىكتەن, دەپورتاتسيالاندى.

«قازاقستاندا ۇقك قىزمەتكەرلەرى ەلدەن كەتۋگە ءبىر اي ۋاقىت بەردى. مەن مۇنى زاڭدى تۇردە جاساي المادىم, ويتكەنى ءوتىنىشىم قاناعاتتاندىرىلمادى. سوندىقتان رەسەي شەكاراسىن زاڭسىز كەسىپ ءوتىپ, وندا شەكارا قىزمەتىنىڭ وفيتسەرلەرى ۇستاپ الدى», – دەدى ميروشنيچەنكو.

Stan.kz جازعانداي, رەسەي سوتى ميروشنيچەنكوعا رەسەي فەدەراتسياسىنا زاڭسىز كىرگەنى ءۇشىن 10 مىڭ رۋبل (50 مىڭ تەڭگەدەي) ايىپپۇل سالدى. سوت ونى ەلدەن شىعارۋ تۋرالى شەشىم شىعاردى. سوعان قاراماستان, 2024 جىلدىڭ جازىندا ەر ادام «ۆوستوك» ەرىكتىلەر جاساعىمەن كەلىسىمشارتقا وتىرىپ, ۋكرايناعا سوعىسقا اتتانادى. التى ايدان كەيىن ول رەسەيگە ورالىپ, بيۋروكراتيالىق ماسەلەلەرگە تاپ بولدى.

«مەن قازاقستانعا ورالا المايمىن, ويتكەنى ول جەردە ارنايى اسكەري وپەراتسياعا قاتىسقانىم ءۇشىن ۇزاق مەرزىمگە باس بوستاندىعىنان ايىرىلامىن. رەسمي تۇردە رەسەي اۋماعىندا دا بولا المايمىن, ويتكەنى تىيىم سالۋ جانە دەپورتاتسيالاۋ تۋرالى قاۋلى بار. سوندىقتان ازاماتتىق الۋعا كومەكتەسۋىڭىزدى سۇرايمىن. مەن رەسەي ازاماتتىعىن الۋعا لايىق ەكەنىمدى ءىس-ارەكەتىممەن دالەلدەدىم دەپ ويلايمىن», – دەدى پەتر ميروشنيچەنكو.

بىرگە سوعىسقا قاتىسقان جىگىتتەر پۋتيننەن دەپورتاتسيانى توقتاتىپ, ميروشنيچەنكوعا رەسەي تولقۇجاتىن بەرۋدى سۇراعان. سوزدەرىنشە, اقمولالىق ەر ادام مينا الاڭدارى مەن ۋكرايندىقتاردىڭ كەدەرگىلەرىن تازارتۋمەن اينالىسقان. سوعىس كەزىندە ول ءوزىن «رەسەيدىڭ تاعدىرىنا الاڭدايتىن» ادام رەتىندە كورسەتتى دەيدى.

قازاقستاندا “جالدامالىلىق” بابى بويىنشا 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان. قىلمىس ولىمگە نەمەسە وزگە دە اۋىر زارداپتارعا اكەپ سوقتىرسا, قازاقستان ازاماتتىعىنان ايىرا وتىرىپ, 15 جىلدان 20 جىلعا دەيىن باس بوستاندىعىنان ايىرادى.