رەسەيدە كارىم ءماسىموۆتىڭ قۇدا بالاسىنا ىزدەۋ جاريالاندى

ىزدەۋدەگى ادامنىڭ اتى-ءجونى – مەدەر قاپەنوۆ. ول 1993 جىلى بىشكەكتە تۋعان. ىزدەۋ سەبەبى بەلگىسىز, بىراق قىلمىستىق باپ بويىنشا كۇدىك بار ەكەنى كورسەتىلگەن.

كۋرسيۆ سايتىنڭ دەرەگىنشە, قازاقستاندا مەدەر قاپەنوۆ «ەۆروترانس اكتيۆ» جشس-نىڭ يەسى. 2020 جىلى تىركەلگەن كومپانيا جىلجىمايتىن م ۇلىكتى جالعا بەرۋ (سۋبارەندا) قىزمەتىمەن اينالىسادى. سونىمەن قاتار, ول 2021 جىلى قۇرىلعان «ترانسكونتەينەر ەۆرازيا» جشس-نىڭ يەسى, ول تاسىمالداۋ جانە ەكسپەديتسيا قىزمەتتەرىن ۇسىنادى.

ەكى كومپانيا دا استانادا تىركەلگەن.

قاپەنوۆتىڭ رەسەيدە دە بيزنەسى بار. 2023 جىلى ماسكەۋدە «رۋبيۋس» اتتى كومپانيا اشقان. كومپانيا قىزمەتى تومەندەگى باعىتتاردى قامتيدى:

• جىلجىمايتىن م ۇلىكتى جالعا بەرۋ, باسقارۋ جانە ساتۋ;
• عيماراتتار, تەمىرجول جانە مەترو قۇرىلىسىن جۇرگىزۋ;
• لوگيستيكا;
• اۆتوموبيلدەر, قۇرىلىس جانە كەڭسە تەحنيكالارىن ليزينگكە بەرۋ.

رف زاڭدى تۇلعالار بىرىڭعاي مەملەكەتتىك ءتىزىلىمىنىڭ (ەگريۋل) مالىمەتتەرى بويىنشا, كومپانيانى قىرعىزستان ازاماتى مەدەر قاپەنوۆ قۇرعان. بۇل دەرەكتى 2022 جىلدىڭ مامىر ايىندا جاريالانعان قىرعىزستان پرەزيدەنتىنىڭ ازاماتتىق بەرۋ تۋرالى جارلىعى دا راستايدى.

2024 جىلدىڭ قاڭتار ايىندا رەسەي 46 جاستاعى ازامات قاپەنوۆكە دە ىزدەۋگە جاريالادى. ونىڭ نە ءۇشىن كۇدىكتى ەكەنى بەلگىسىز.

تامىز ايىندا قازاقستان دا ازامات قاپەنوۆتى الاياقتىققا كۇدىكتى دەپ, ىزدەۋ جاريالادى. انتيكور ونىڭ قايدا ەكەنىن ايتقان ادامعا قوماقتى سىياقى ۇسىندى.

ازامات قاپەنوۆ – قىرعىزستان تۋماسى, رەسەي ازاماتى. ول 2015 جىلى كارىم ءماسىموۆتىڭ ۇلكەن قىزى تاميللا كارىمگە ۇيلەنىپ, كوپشىلىككە تانىلعان.