رەسەيدە قازاقستاندا جوق ساراپتاما جاسالادى: دەپۋتات شەرزات ءىسى تۋرالى ايتتى

فوتو:Dalanews.kz.

جۋىردا سەناتتا وتكەن بريفينگتە شەرزات بولاتتىڭ ىسىنە قاتىستى جاڭا دەرەكتەر جاريا بولدى. باس پروكۋروردىڭ ورىنباسارى عالىمجان قويگەلديەۆ شەرزات بولاتتىڭ ءۇيى ورتەنۋىنە قاتىستى ءىستى تەرگەۋ بارىسىن ءبولىستى. وسىلايشا كەيبىر ساۋالدار رەسەيگە جىبەرىلگەنى بەلگىلى بولدى, دەپ جازدى qandastar.kz

بۇل قانداي ساراپتاما? نەلىكتەن رەسەيگە جىبەرىلدى? وسى سۇراقتارعا ءماجىلىس دەپۋتاتى ءارى زاڭگەر ابزال قۇسپان جاۋاپ بەردى, دەپ حابارلايدى Dalanews.kz.

شەرزاتتىڭ وتباسىنىڭ ادۆوكاتى مەيىرمان شەكەەۆ دەپۋتات ابزال قۇسپانعا وسى باعىتتا بىرەر ساۋال قويعان. بۇل تۋرالى ادۆوكات الەۋمەتتىك جەلىدە جاريالادى.

«بۇل اقپاراتتى راستايمىن. رەسەيدە قازاقستاندا جوق ساراپتاما تاعايىندالىپ وتىر. سپۋتنيك ارقىلى ءۇي ورتەنگەن كەزدە قانداي كولىك كەلدى, بۇعان دەيىن, ودان كەيىن بوتەن ادامدار بولدى ما, بولمادى ما (وسى نارسەلەر انىقتالادى — ەسك.)», — دەدى ابزال قۇسپان.

ادۆوكات دەپۋتاتتان شەرزاتتىڭ اعاسى نۇرعاناتتىڭ ولىمىنە قاتىستى دا رەسەيدە وسىنداي ساراپتاما جۇرگىزۋ مۇمكىندىگى بار-جوعىن سۇرادى. دەپۋتات قۇزىرلى ورگاندار ادىلدىك ورناتۋدا بۇدان تارتىنباۋ كەرەك دەيدى.

«مەنىڭ ويىمشا, قورعاۋ تاراپىنان ءتيىستى ءوتىنىش حات بەرىلگەن جاعدايدا ابدەن مۇمكىن. كەز كەلگەن قىلمىستىق ءىستى تەرگەۋدەگى باستى ماسەلە — شىندىققا كوز جەتكىزۋ, ادىلەتتىلىكتى قالپىنا كەلتىرۋ. بۇل جولى دا قانداي ساراپتاما بولسا دا, قانشا اقشا تۇرسا دا ءتيىستى ورگاندار بۇدان تارتىنىپ قالماۋى كەرەك دەپ ويلايمىن», — دەدى دەپۋتات.

ايتا كەتەيىك, بۇعان دەيىن باس پروكۋراتۋرا وكىلى بۇل تەكسەرىسكە ۋاقىت كەرەك ەكەنىن مالىمدەگەن ەدى.

شەرزات بولاتتىڭ ءولىمى تۋرالى نە بەلگىلى?

ەسكە سالايىق, بىلتىر تالعاردا جاپپاي توبەلەس بولىپ, سالدارىنان 16 جاستاعى ءجاسوسپىرىم شەرزات بولات كوز جۇمدى.

كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليتسيا دەپارتامەنتى قىلمىستىق ءىس قوزعادى. سونداي-اق, ولاردىڭ ءۇيى ورتەنىپ كەتتى.

كوپ ۇزاماي, ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپباەۆ اجال قۇشتى. پوليتسيا دەپارتامەنتى الدىن الا دەرەكتەر بويىنشا ول سۋيتسيد جاساعانىن مالىمدەدى. وعان دالەل رەتىندە پوليتسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى. 

ال مارقۇم شەرزاتتىڭ اكەسى باۋىرى نۇرعانات عايىپباەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ, كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليتسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.