Reseıde «qazaqtan qysym kórgen orys depýtatynyń» obrazy qalyptasýda — jýrnalıst

Foto: Majılıs 

Depýtat Shatalovtyń ańdamaı sóılegen sózi Qazaqstanǵa qalaı soqtyǵaryn bilmeı otyrǵan Kremlge azyq boldy dep jazypty  Ertenmedia.kz.

Jýrnalıst Janııa Uranqaevanyń pikirinshe depýtattyń Ýkraına men Máskeýge qatysty daýly málimdemesi mine, birneshe kún boldy Reseı medıasynyń kún tártibinen túspeı tur… «Orys propagandasy «Shatalov qazaqtardan qysym kórýde», «Qazaq qoǵamy qysymǵa alǵan depýtattyń muń-zary…» degen maǵynadaǵy kontentti birinen-biri ilip áketip, toqtaýsyz taratýda,  dep habarlaıdy qandastar.kz

Ýkraına men Reseı arasyndaǵy qantógistiń túp-tórkini de osy aqparattyq soǵystan bastalǵan. Reseı telearnalary ondaǵan jyl boıy Kıevti qubyjyq qylyp kórsetip, jekkórýshilik sezimin úzdiksiz qozdatyp keldi. Ýkraına óz kezeginde muny «maǵynasyz shoý» dep sanap, kóp jaǵdaıda únsiz qalatyn. Sonyń nátıjesin búgin búkil álem kórip otyr. Mundaıda únsiz qalý, úıden báleden qutylýdy bildirmeıdi. Shatalovtyń «orys bolǵanym úshin qysym kórdim» degen sózi de dál sol súrleýmen jaıylyp barady. RBK, Rıa, Lenta basylymdary bul taqyrypty qaýzaýdan sharshar emes. Olar Shatalovty qýǵyn-súrgin qurbany retinde kórsetýde.

Al bizdiń Mınıstrliktiń aqparattyq saıasatqa jaýapty organdary bolsa, dál osy sátte buǵyp, ishki tirlikpen ǵana aınalysyp, qajetsiz erejeler men shekteýlerdi oılap tabýmen áýre. Shyndyǵynda, dál qazir Aqparmın dál osy máselege aralasýy tıis. Memlekettik arnalar men saıttar depýtat Shatalovty suhbatqa shaqyryp, Smırnova syndy tulǵalardy tartyp, ashyq alań uıymdastyrǵany jón. Olar óz kezeginde qazaqtan eshbir qysym kórmegenin, osy elde kóılegi kók, kóńili toq, shalqyp basyp ómir súretinin jasyrmaı aıtýy kerek. Aqıqaty da osy ǵoı. Aqparat – qaýipti qural. Kishkentaı bir ushqynnyń ózi úlken órtke ulasýy múmkin ekenin dáleldep turǵan Ýkraına mysaly kóz aldymyzda. Memleket deńgeıinde reseılik medıanyń arandatýyna salǵyrt qaramaı, saýatty jaýap qatatyn ýaqyt keldi. Shatalov oqıǵasy eskertý. Osyny umytpaıyq».