Reseıde quldyqtan qashyp shyqqan qazaqstandyqtar úndeý jasady

Reseıde quldyqtan qashyp shyqqan Qazaqstan azamattary bılikten kómek surap, málimdeme jasady, dep jazdy qandastar.kz

Kórshi memlekette qorlyq kórgen otandastarymyz aqshasyz, qujatsyz Qazaqstanǵa qaıta almaı júrgenderin aıtyp, bılikten qol ushyn sozýdy surady.

“Qaltamyzda kók tıynymyz joq. Qujatymyzdy tartyp aldy. Taza quldyq boldy. Endi qaıta almaı otyrmyz”, – dedi olar.

Sózderinshe, úsh jigit Reseıdiń Jeleznogorsk qalasyna jumys isteýge barǵan. Biraq bir mıllıon teńgege deıin jalaqy degen jarnama jalǵan bolyp shyqqanyn aıtady. Olardy tegin jumysqa jegip, eshqaıda shyǵarmady dep kúıinedi.

Quldyqtan qashyp shyqtyq degen jerlesterimiz Máskeýde jasyrynyp júrgenin aıtty. Syrtqy ister mınıstrliginiń ókilderi Qazaqstan azamattary elge aman-esen oralǵanyn málimdedi. Qazir jaǵdaı rettelgen, alańdaýǵa negiz joq dep otyr.