Reseıde sońǵy júz jylda bolmaǵan sý tasqyny oryn alýda

Reseıde sońǵy júz jylda bolmaǵan sumdyq alapat sý tasqyny bolyp jatyr. Orynbordyń tarıhynda bundaı joıqyn sý basý tirkelmepti. Dál qazirgi sátte Orynbor oblysynda sý basqan úılerdiń sany 6,3 myńǵa jýyq, Orskide 4,5 myń úıge deıin ósti, dep habarlady RF jedel qyzmetteri. Oblysta 4 adam sýǵa ketip qaıtys bolǵan. Biraq, jergilikti bılik ekeýi ınfarkten, bireýi sýııd jasap ólse,bireýi óz ajalynan ólgen dep otyr.

Tasqynnyń qatty bolǵany sonsha, oblystaǵy keıbir joldardy 15-shi sáýirge deıin jaýyp tastaǵan.

Orynbor oblysyndaǵy Ýral (Jaıyq) ózeniniń deńgeıi 11 metrge jetti. Bashqurtstan men Chelıabi oblysynan Irıklınskoe sý qoımasyna erigen qar sýynyń aǵyny azdap azaıdy, biraq áli de rekordtyq kórsetkishti ustap tur. Sol sebepti qoımadan sý aǵyzýdyń kólemi azaımaıdy – sekýndyna 2170 tekshe metr. Sorochınskoe sý qoımasynda sý aǵyzý sekýndyna 690-dan 650 tekshe metrge deıin tómendedi. Sý aǵyny – sekýndyna 643 tekshe metr.

Orsk qalasynda jappaı kran sýynan ýlaný jaǵdaılary tirkeldi. Eki kún ishinde 18 adam aýrýhanaǵa jatqyzylyp, qalǵandary ambýlatorlyq em alýda. Naýqas adamdardan 2 tıpti norovırýs anyqtaldy.

Orskiden bastalǵan dúrbeleń qazir Orynbormen jalǵasýda. Túnde oblys ortalyǵynyń ortalyq jaǵajaıyn sý basty. Búkil stanııalar shtattyq rejımge kóshirildi.

Ońǵar Qabden