جاڭالىقتار
رەسەيدە تاسقىننان زارداپ شەككەندەرگە وتەماقى تولەنەدى
![](https://qandastar.kz/wp-content/uploads/2024/04/IMG_5271-780x405.jpeg)
رەسەيدە تاسقىننان زارداپ شەككەن تۇرعىندارعا 20 مىڭ رۋبل كولەمىندە وتەماقى تولەنەدى,
حالىقتىڭ العاشقى لەگى ماتەريالدىق كومەككە بىرتىندەپ قول جەتكىزىپ جاتىر. بىراق ايماقتاردا قاۋىپ سەيىلمەي تۇر. تاسقىن باستالعالى 370-كە جۋىق ەلدى مەكەندى سۋ باسقان. جەرگىلىكتى حالىقتى قۇتقارۋ جۇمىستارى جالعاسىپ جاتىر. قورعاندا قاۋىپ ارتىپ كەلەدى. توبىل وزەنىندە سۋ دەڭگەيى 743 سم-گە جەتىپ, 12 ەلدى مەكەن سۋ استىندا قالعان. تاعى 205 ءۇي مەن 320 جەر القابىن باسقان.
ماماندار قورعان قالاسىن قوسا العاندا 7 مۋنيتسيپالدى وكرۋگتەگى باس-اياعى 62 ەلدى مەكەن قاۋىپتى ايماققا كىرەتىنىن ەسكەرتتى. قازىر ۇزىندىعى 30 شاقىرىمعا جەتەتىن بوگەتتى نىعايتۋ جۇمىستارى جۇرگىزىلىپ جاتىر. وعان 200-دەن استام تەحنيكا مەن 14 مىڭ مامان تارتىلعان. سونداي-اق ارنايى بريگادا امۋر ايماعىنان 20 سۋ قۇياتىن دامبا جەتكىزدى. قازىر تۇرعىنداردى ەۆاكۋاتسيالاۋ جۇمىستارى ۇزدىكسىز جالعاسىپ جاتىر. اناستاسيا ارگىشەۆا, قورعان قالاسى مەرىنىڭ مىندەتىن اتقارۋشى: – بىزگە كومەك كەرەك. سۋ, ءدارى-دارمەك, كورپە-جاستىق سەكىلدى زاتتار قاجەت. ولاردى ۋاقىتشا ورتالىقتارعا اكەلە بەرسەڭىزدەر بولادى. سونداي-اق ماماندارعا كوبىرەك قاپ, كۇرەك, قولعاپ كەرەك. بۇدان بولەك, ەۆاكۋاتسيالاۋعا جاردەمدەسەتىن ەرىكتىلەردىڭ دە كومەگى ارتىق بولمايدى. ورىنبور جۇرتىن جايىقتىڭ جايى الاڭداتىپ وتىر. مۇندا سۋ مولشەرى رەكوردتىق دەڭگەيگە جەتىپ, 11 مەتردەن استى.
78 ەلدى مەكەندە 12 مىڭنان استام ءۇي, 15 مىڭنان استام جەر القابىن توپان سۋ باسقان. حالىقتى ەۆاكۋاتسيالاۋ ءۇشىن 41 ۋاقىتشا باسپانا جۇمىس ىستەپ تۇر. وندا 1400-دەن استام حالىق قونىستانعان. بالا سانى 300-گە جۋىقتايدى. اندرەي بەسپومەستنىي, قوعامدىق ورتالىق ديرەكتورى: – مۇندا تۇرمىستىق حيميا, توسەكجابدىق سىندى كۇنكورىسكە كەرەكتىنىڭ ءبارى بار. ءبىز تۇرعىنداردىڭ بارلىعىن قاجەتىنشە قامتاماسىز ەتەمىز. تاۋلىگىنە 3 رەت ىستىق تاماق بەرىلەدى. ايماقتا ينفراقۇرىلىمدى قالپىنا كەلتىرۋ ءۇشىن 40 ملرد رۋبل قاجەت. ورىنبور وبلىسىنىڭ گۋبەرناتورى رف پرەزيدەنتىنە سوڭعى ەسەبىندە وسىلاي دەپ مالىمدەدى.
ال تاسقىننان زارداپ شەككەن تۇرعىندارعا 20 مىڭ رۋبل كولەمىندە وتەماقى تولەنەدى. جەرگىلىكتى حالىق ۇكىمەتكە قاجەتتى قۇجاتتارىن وتكىزىپ, ماتەريالدىق كومەك الا باستادى.