رەسەيدە جاعداي قيىندادى

رەسەي دەنساۋلىق ساقتاۋ مينيسترلىگى 7 ساۋىردە ورىنبور وبلىسى ور قالاسىندا سۋ تاسقىنىنان ونداعان ادام زارداپ شەككەنىن, بىرنەشەۋى اۋرۋحاناعا تۇسكەنىن حابارلادى.

«ور قالاسىنداعى جاعدايعا بايلانىستى 99 ادام مەديتسينالىق كومەككە جۇگىندى, ونىڭ 18-ءى — بالا, 6 ەرەسەك ادام مەن 3 بالا اۋرۋحاناعا جاتقىزىلدى, ولاردىڭ دەنساۋلىعىنا قاۋىپ جوق. قالعاندارىنا دا كومەك كورسەتىلدى» دەدى رەسەي دەنساۋلىق ساقتاۋ ءمينيسترىنىڭ كومەكشىسى الەكسەي كۋزنەتسوۆ. ونىڭ ءسوزىن تاسس اگەنتتىگى جاريالادى.

بۇعان دەيىن رەسەي بيلىگى سۋ باسقان ور قالاسىندا 4 ادام مەرت بولعانىن حابارلاعان, بىراق ولاردىڭ ەشبىرىنىڭ اجالى سۋدان بولماعان دەپ مالىمدەدى. «ەكەۋى جۇرەك تالماسىنان, بىرەۋى ءوز اجالىنان قايتىس بولعان, تاعى بىرەۋى وزىنە ءوزى قول سالعان» دەپ حابارلادى قالا اكىمدىگىنە سىلتەگەن ريا «نوۆوستي» سايتى.

ورىنبوردا دا جاعداي قيىنداي ءتۇستى, جەرگىلىكتى بيلىك بىرنەشە كوشە مەن اللەيانى جاۋىپ, قاۋىپتى ايماقتاعى تۇرعىنداردى ءوز ەركىمەن ۇيىنەن كەتۋگە ۇندەۋدى.

ور قالاسىنداعى كەيبىر اۋدانىندا سۋ ءۇيدىڭ ءبىرىنشى قاباتىنىڭ تەرەزەسىنە دەيىن جەتكەن, ادامدار قالادا قايىق ءمىنىپ ءجۇر. تاسقىن سالدارىنان ور قالاسىنداعى بارلىق مەكتەپ قاشىقتان وقۋعا كوشكەن. مۇناي وڭدەۋ زاۋىتى دا تاسقىنعا بايلانىستى جۇمىسىن توقتاتتى دەپ حابارلادى «ورسكنەفتەورگسينتەز» كومپانياسىنىڭ ءباسپاسوز قىزمەتى.