Reseıde jaǵdaı qıyndady

Reseı densaýlyq saqtaý mınıstrligi 7 sáýirde Orynbor oblysy Or qalasynda sý tasqynynan ondaǵan adam zardap shekkenin, birnesheýi aýrýhanaǵa túskenin habarlady.

«Or qalasyndaǵy jaǵdaıǵa baılanysty 99 adam medıınalyq kómekke júgindi, onyń 18-i — bala, 6 eresek adam men 3 bala aýrýhanaǵa jatqyzyldy, olardyń densaýlyǵyna qaýip joq. Qalǵandaryna da kómek kórsetildi» dedi Reseı densaýlyq saqtaý mınıstriniń kómekshisi Alekseı Kýzneov. Onyń sózin TASS agenttigi jarııalady.

Buǵan deıin Reseı bıligi sý basqan Or qalasynda 4 adam mert bolǵanyn habarlaǵan, biraq olardyń eshbiriniń ajaly sýdan bolmaǵan dep málimdedi. «Ekeýi júrek talmasynan, bireýi óz ajalynan qaıtys bolǵan, taǵy bireýi ózine ózi qol salǵan» dep habarlady qala ákimdigine siltegen RIA «Novostı» saıty.

Orynborda da jaǵdaı qıyndaı tústi, jergilikti bılik birneshe kóshe men alleıany jaýyp, qaýipti aımaqtaǵy turǵyndardy óz erkimen úıinen ketýge úndeýdi.

Or qalasyndaǵy keıbir aýdanynda sý úıdiń birinshi qabatynyń terezesine deıin jetken, adamdar qalada qaıyq minip júr. Tasqyn saldarynan Or qalasyndaǵy barlyq mektep qashyqtan oqýǵa kóshken. Munaı óńdeý zaýyty da tasqynǵa baılanysty jumysyn toqtatty dep habarlady «Orsknefteorgsıntez» kompanııasynyń baspasóz qyzmeti.