ءماجىلىس دەپۋتاتى ەرلان سايروۆ بيۋدجەتتەن بولىنگەن قارجىنىڭ تيىمسىزدىگىن سىناپ, قازاقستاننىڭ سۋ ماسەلەسىن كوتەردى, دەپ حابارلايدى qandastar.kz سايتى.

دەپۋتات باتىس قازاقستانداعى سۋ جەتىسپەۋشىلىگى مەن ءتيىمسىز سۋ پايدالانۋ ماسەلەسىن ايتتى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بۇل ماسەلەنى شەشۋ ءۇشىن ەكى سۋ قويماسىنىڭ قۇرىلىسىن باستاۋ جوسپارىن ءبولىستى.

«ءسىزدىڭ ەسەبىڭىزدە قازاقستانداعى سۋ ماسەلەسى جايلى. وتە جاقسى ايتىلعان, بىراق ومىردە جاعداي باسقا. قازتالوۆ اۋدانىندا ءبىز رەسەيدەن سۋ الىپ وتىرمىز, بىراق سول سۋ جالپاقتالدان ءوتىپ, قۇمعا ءسىڭىپ كەتەدى. وسىلايشا جىل سايىن بيۋدجەتتىڭ 5 ميلليارد تەڭگەسى بەكەرگە جۇمسالىپ وتىر. جالپاقتالدا سۋ قويماسىن سالۋ جوباسى 10 جىل بۇرىن باستالعان, بىراق ءالى اياقتالمادى. ماسەلەنى قاشان شەشەمىز?» – دەپ سۇرادى دەپۋتات ەرلان سايروۆ مينيستردەن.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ءوز جاۋابىندا ماسەلەنىڭ شەشىمىن ۇسىندى. ءمينيستردىڭ ايتۋىنشا, باتىس قازاقستاندا ەكى جاڭا سۋ قويماسىنىڭ قۇرىلىسى باستالماق. بۇل جوبالار رەسەيدەن الىناتىن سۋدىڭ كولەمىن قىسقارتۋعا جانە ەكولوگيالىق جاعدايدى جاقسارتۋعا باعىتتالعان.

«دۇرىس ايتاسىز, باتىس قازاقستانداعى سۋ ماسەلەسىن شەشۋ ءۇشىن ەكى سۋ قويماسىن سالۋ قاجەت. ءبىز جىل سايىن رەسەيدەن 350 ميلليون تەكشە مەتر سۋ الامىز. بۇل جوبانىڭ ەكولوگيالىق اسەرى بار جانە سۋ جەرگە كەتكەنمەن, ول ءوزىمىزدىڭ باتىس قازاقستانعا قايتىپ كەلەدى. سوندىقتان ءتيىمسىز قاراجات بولەمىز دەپ ايتۋعا بولمايدى», – دەپ جاۋاپ بەردى مينيستر.

جوبالار ىسكە اسىرىلعان جاعدايدا, بۇل ماسەلەنى شەشۋگە جانە ايماقتىڭ ەكولوگيالىق جاعدايىن جاقسارتۋعا ۇلكەن اسەر ەتەدى.