رەسەيدىڭ ونداعان ايماعىن سۋ باستى

ورسكىدە قالاسىنىڭ ەسكى بولىگىندەگى كوشەلەردىڭ ءبارىن سۋ باسقان. تاسىعان سۋ ۇيلەردىڭ توبەسىنە دەيىن جەتكەن. ادامدار قايىقپەن قاتىناپ ءجۇر.

جالپى ورىنبور وبلىسىنداعى جايىق سۋى ون ءبىر مەترگە دەيىن كوتەرىلگەن. ماماندار بۇل 2014 جىلى سالىنعان جاڭا بوگەتتىڭ جوبالىق دەڭگەيىنەن ەكى ەسە كوپ دەيدى. ورىنبور وبلىسىنىڭ گۋبەرناتورى دا مۇنى ءوڭىر تاريحىنداعى ەڭ ءىرى سۋ تاسقىنى دەپ ايتتى. جەرگىلىكتى بيلىك باشقۇرتستان مەن چەليابى وبلىسىنان يريكلا وزەنىنىڭ تاسۋى ءبىراز باسىلعانىمەن ءالى دە قاتتى دەپ وتىر. قازىر يريكلينسك قويماسىنان اعىزالاتىن سۋ مولشەرى بەس ءجۇز تەكشە مەترگە ازايتىلدى.

دەگەنمەن, ماماندار جاقىن ارادا نوسەر جاۋى مۇمكىن دەپ بولجايدى. ورىنبور وبلىسىندا رەسەيدىڭ وزگە وڭىرلەرىنەن كەلگەن جەتى ءجۇز قۇتقارۋشى جۇمىس ىستەپ جاتىر. احۋالعا قاتىستى توتەنشە جاعدايلار مينيسترلىگى وكىلىن تىڭدايىق.

الەكساندر سيتنيكوۆ, رف توتەنشە جاعدايلار مينيسترلىگىنىڭ وكىلى: — ورسك قالاسىنىڭ ەسكى بولىگىندە سۋ ءالى تاسىپ جاتىر. اپات اۋداندارىنان تۇرعىنداردى ەۆاكۋاتسيالاۋدى توتەنشە جاعدايلار مينيسترلىگى مەن باسقا دا قۇرامالار جۇزەگە اسىرۋدا.

ادامداردى قاۋىپسىز جەرلەرگە قايىقتارمەن كوشىرۋ ءۇشىن پەرم وبلىسىنان ارنايى اەروموبيل توبى كومەككە كەلدى. قازىر سۋ باسقان ايماقتان ءتورت جارىم مىڭنان استام تۇرعىن ەۆاكۋاتسيالاندى. جەرگىلىكتى بيلىك 33 ورنالاستىرۋ پۋنكتىن اشامىز دەپ مالىمدەدى. ولار 23 مىڭ ادامدى قابىلداي الادى.ورىنبور وبلىسىنان باسقا رەسەيدىڭ تاعى 35 ايماعى سۋ تاسقىنىنان زارداپ شەگىپ وتىر. التاي ولكەسىندە دە توتەنشە جاعداي ەنگىزىلدى. بۇل ايماقتا بەس جۇزدەن استام ءۇي سۋ استىندا قالدى. سامارا وبلىسىنداعى توعىز اۋداندى سۋ باستى. بەس جۇزگە جۋىق ادام ەۆاكۋاتسيالاندى.