رەسەيدىڭ تاعى بىرنەشە ايماعىنا قاۋىپ ءتونىپ تۇر

وتكەن اپتادا دامبا جارىلعان ورسك قالاسىنىڭ وزىندە ب ۇلىنگەن ۇيلەردەن كەلگەن الدىن الا شىعىن 21 ميلليارد دوللارعا باعالانىپ وتىر. قازىر ورسك قالاسىندا جاعداي تۇراقتالا باستاعانعا ۇقسايدى.

بىراق وبلىس ورتالىعى ورىنبوردا كەرىسىنشە قاۋىپ كۇشەيىپ بارادى. قازىر رەسەيدە اسىرەسە, ورىنبور وبلىسىندا جاعداي قيىن. سوڭعى مالىمەت بويىنشا, مۇندا جايىق وزەنىنىڭ دەڭگەيى 10 مەتر 87 سانتيمەرگە جەتكەن. سالدارىنان تاعى مىڭداعان ءۇيدى سۋ باسۋ قاۋپى ءتونىپ تۇر. بىرنەشە كۇن بۇرىن بيلىك جايىق وزەنىنىڭ دەڭگەيى 9 مەتر 30 سانتيمەترلىك كورسەتكىشكە تاياسا, ورىنبور قالاسىندا جاعداي قيىنداي تۇسەتىنىن ەسكەرتكەن. سۋ قاۋىپتى مەجەدەن اسىپ كەتتى. قازىر 11 مەترگە جۋىقتايدى. بۇل بۇرىن-سوڭدى بولماعان جاعداي. ورىنبور وبلىسى بويىنشا 13 مىڭداي ءۇيدى سۋ باسقان. كەيبىر اۋداندا, سۋدان تەك ۇيلەردىڭ شاتىرى عانا كورىنىپ تۇر. ماماندار مۇنىمەن توقتاماي, سۋ ءالى دە كوتەرىلەتىنىن ەسكەرتەدى.

ءسويتىپ تاعى 3 جارىم مىڭ باسپاناعا قاۋىپ ءتونىپ تۇر. تاسقىن ەكى فەدەرالدىق تاس جولعا دا جەتەدى دەگەن كۇدىك بار. قازىر ونداعى كولىك قوزعالىسى توقتاعان. وزگە وڭىرلەردەن ورىنبور وبلىسىنىڭ تۇرعىندارىنا 35 توننا گۋمانيتارلىق كومەك جەتكىزىلگەن. احۋالدىڭ قيىنداۋىنا بايلانىستى كورشى ەلدىڭ توتەنشە جاعدايلار ءمينيسترى وسىمەن ءۇشىنشى رەت ايماققا باردى. سەرگەي كۋدينوۆ, ورىنبور وبلىسى گۋبەرناتورىنىڭ ءبىرىنشى ورىنباسارى: — ورىنبور قالاسىنداعى جاعداي كۇردەلى. كۇن سايىن سۋ دەڭگەيىنىڭ كوتەرىلىپ جاتقانىن كورىپ وتىرمىز. كەيىنگى تاۋلىكتىڭ وزىندە 80 سانتيمەترگە كوتەرىلگەن.

قازىر كوپقاباتتى ۇيلەردى سۋ باسۋىن بولدىرماۋ كەرەك, سونداي-اق تازالاۋ قۇرىلعىلارىنىڭ جۇمىسىن توقتاتپاۋىمىز قاجەت. ءبىز ءۇشىن وسى ماڭىزدى. جايىق وزەنىندەگى سۋ بۇرىن-سوڭدى بولماعان دەڭگەيگە جەتتى. مۇنىڭ الدىنداعى رەكورد 1942 جىلى تىركەلگەن ەدى. ول كەزدە كورسەتكىش 962 سانتيمەتر بولعان.

قورعان وبلىسىندا دا جاعداي قيىن. توبىل وزەنىنىڭ دەڭگەيى كوتەرىلىپ جاتىر. ول 11 مەترگە دەيىن جەتەدى دەگەن بولجام بار. قازىردىڭ وزىندە كورسەتكىش 10 مەترلىك مەجەدەن اسىپ كەتتى.

سوندىقتان بيلىك اپتا سوڭىنا دەيىن تۇرعىنداردى ۇلكەن سىناق كۇتىپ تۇرعانىن ەسكەرتەدى. وبلىس بويىنشا 62 ەلدى مەكەن قاۋىپتى ايماققا كىرىپ وتىر. قازىر وڭتۇستىك وڭىرلەردى سۋ باسۋدا. 15 ەلدى مەكەن جارىقسىز قالدى. 6 مىڭنان اسا تۇرعىن ءۇي-جايىن تاستاپ, قاۋىپسىز جەرگە كوشىرىلگەن. ايماقتا ءسات سايىن ەۆاكۋاتسيا دابىلى قوسىلىپ تۇرادى.