Reseıdiń Taǵy birneshe aımaǵyna qaýip tónip tur

О́tken aptada damba jarylǵan Orsk qalasynyń ózinde búlingen úılerden kelgen aldyn ala shyǵyn 21 mıllıard dollarǵa baǵalanyp otyr. Qazir Orsk qalasynda jaǵdaı turaqtala bastaǵanǵa uqsaıdy.

Biraq oblys ortalyǵy Orynborda kerisinshe qaýip kúsheıip barady. Qazir Reseıde ásirese, Orynbor oblysynda jaǵdaı qıyn. Sońǵy málimet boıynsha, munda Jaıyq ózeniniń deńgeıi 10 metr 87 santımerge jetken. Saldarynan taǵy myńdaǵan úıdi sý basý qaýpi tónip tur. Birneshe kún buryn bılik Jaıyq ózeniniń deńgeıi 9 metr 30 santımetrlik kórsetkishke taıasa, Orynbor qalasynda jaǵdaı qıyndaı túsetinin eskertken. Sý qaýipti mejeden asyp ketti. Qazir 11 metrge jýyqtaıdy. Bul buryn-sońdy bolmaǵan jaǵdaı. Orynbor oblysy boıynsha 13 myńdaı úıdi sý basqan. Keıbir aýdanda, sýdan tek úılerdiń shatyry ǵana kórinip tur. Mamandar munymen toqtamaı, sý áli de kóteriletinin eskertedi.

Sóıtip taǵy 3 jarym myń baspanaǵa qaýip tónip tur. Tasqyn eki federaldyq tas jolǵa da jetedi degen kúdik bar. Qazir ondaǵy kólik qozǵalysy toqtaǵan. О́zge óńirlerden Orynbor oblysynyń turǵyndaryna 35 tonna gýmanıtarlyq kómek jetkizilgen. Ahýaldyń qıyndaýyna baılanysty kórshi eldiń tótenshe jaǵdaılar mınıstri osymen úshinshi ret aımaqqa bardy. Sergeı Kýdınov, Orynbor oblysy gýbernatorynyń birinshi orynbasary: — Orynbor qalasyndaǵy jaǵdaı kúrdeli. Kún saıyn sý deńgeıiniń kóterilip jatqanyn kórip otyrmyz. Keıingi táýliktiń ózinde 80 santımetrge kóterilgen.

Qazir kópqabatty úılerdi sý basýyn boldyrmaý kerek, sondaı-aq tazalaý qurylǵylarynyń jumysyn toqtatpaýymyz qajet. Biz úshin osy mańyzdy. Jaıyq ózenindegi sý buryn-sońdy bolmaǵan deńgeıge jetti. Munyń aldyndaǵy rekord 1942 jyly tirkelgen edi. Ol kezde kórsetkish 962 santımetr bolǵan.

Qorǵan oblysynda da jaǵdaı qıyn. Tobyl ózeniniń deńgeıi kóterilip jatyr. Ol 11 metrge deıin jetedi degen boljam bar. Qazirdiń ózinde kórsetkish 10 metrlik mejeden asyp ketti.

Sondyqtan bılik apta sońyna deıin turǵyndardy úlken synaq kútip turǵanyn eskertedi. Oblys boıynsha 62 eldi meken qaýipti aımaqqa kirip otyr. Qazir ońtústik óńirlerdi sý basýda. 15 eldi meken jaryqsyz qaldy. 6 myńnan asa turǵyn úı-jaıyn tastap, qaýipsiz jerge kóshirilgen. Aımaqta sát saıyn evakýaııa dabyly qosylyp turady.