الەم جاڭالىقتارى
رەسەيلىك كومپانيالار قازاقستان ارقىلى قىتايعا كومىر تاسىمالداۋعا قىزىعۋشىلىق تانىتۋدا
فوتو: قتج
رەسەيلىك كومپانيالار قازاقستان ارقىلى قىتايعا كومىر تاسىمالداۋعا قىزىعۋشىلىق تانىتىپ وتىر. بۇل ماسەلەنى ماسكەۋدە قر كولىك ءمينيسترى مارات قاراباەۆ پەن رف كولىك ءمينيسترى رومان ستاروۆوي ءوزارا تالقىلادى, دەپ حابارلايدى qandastar.kz
قازاقستان مەن رەسەي «سولتۇستىك – وڭتۇستىك» كولىك ءدالىزىن دامىتۋ جانە رەسەي كومىرىن قازاقستان اۋماعى ارقىلى قىتايعا تاسىمالداۋ ماسەلەلەرىن تالقىلادى, دەلىنگەن قۇزىرلى مينيسترلىك ءباسپاسوز قىزمەتىنىڭ حابارلاماسىندا.
ماسكەۋ قالاسىندا قازاقستان رەسپۋبليكاسى كولىك ءمينيسترى مارات قاراباەۆتىڭ رەسەي فەدەراتسياسىنىڭ كولىك ءمينيسترى رومان ستاروۆويتپەن جانە رەسەي فەدەراتسياسىنىڭ ەنەرگەتيكا ءمينيسترى سەرگەي تسيۆيليوۆپەن كەزدەسۋى ءوتتى. سونداي-اق كەلىسسوزدەرگە «قتج» ۇك» اق مەن «رجد» ااق باسشىلارى دا قاتىستى.
«اتالعان كەزدەسۋگە دەيىن ەكى ەلدىڭ تەمىرجولشىلارى رەسەيلىك كومىر ءوندىرۋشى كومپانيالاردىڭ قاتىسۋىمەن بىرقاتار كەڭەس وتكىزدى. باسقوسۋ بارىسىندا تاراپتار ترانزيتتىك تاسىمالدى قازاقستان اۋماعى ارقىلى جۇزەگە اسىرۋعا جوعارى قىزىعۋشىلىق تانىتتى, سەبەبى بۇل مارشرۋت سۇرانىسقا يە ءارى بولاشاعى بار بالاما رەتىندە قاراستىرىلىپ وتىر», دەلىنگەن رەسمي حابارلامادا.
Dalanews.kz جازعانداي, كەزدەسۋ اياسىندا ەكى ەل اراسىنداعى سەرىكتەستىكتى نىعايتۋ, تاسىمالداردىڭ تيىمدىلىگىن ارتتىرۋ جانە كولىك-لوگيستيكا ينفراقۇرىلىمىن دامىتۋ پەرسپەكتيۆالارى قاراستىرىلدى.
بۇعان دەيىن حيۋستوندا حالىقارالىق CERAWeek 2025 ەنەرگەتيكالىق كونفەرەنتسياسى اياسىندا قازاقستان رەسپۋبليكاسىنىڭ ەنەرگەتيكا ءمينيسترى الماسادام ساتقاليەۆ اقش ەنەرگەتيكا ءمينيسترى كريس رايتپەن كەزدەسكەنىن جازعانبىز. تاراپتار, سانكتسيالىق شەكتەۋلەردىڭ قازاقستاندىق مۇنايدى الەمدىك نارىققا تۇراقتى جەتكىزۋگە اسەر ەتۋ ماسەلەلەرىن دە تالقىلاعان بولاتىن.
