رەسەيلىكتەر اشۋلى: چەرچەسوۆپەن جانجال – تازا ارانداتۋ, سۇراق قويعان ءجۋرناليستىڭ قۇرىلىسقا كەتكەنى ءجون

فوتو: Sportbox

Match TV كوممەنتاتورى گەورگي چەردانتسەۆ قازاقستان قۇراماسىنىڭ باس باپكەرى ستانيسلاۆ چەرچەسوۆپەن بولعان ءتىل داۋىن ارانداتۋشىلىق دەپ اتادى, – دەپ جازادى qandastar.kz

«بۇل – تازا ارانداتۋشىلىق. سۇراق قويعان ادام ورىسشا بىلەدى. ول مۇنىمەن نە نارسەگە قول جەتكىزگىسى كەلدى? 61 جاستاعى ەڭبەك سىڭىرگەن مامانعا شەت ءتىلىن ۇيرەنۋ كەرەك پە? ونى قازاقستانعا باسقا نارسە ءۇشىن شاقىردى. فەدەراتسيانىڭ ءباسپاسوز اتتاشەسى بۇل ماسەلەنى شەشىپ, تىم بولماسا اۋدارماشىنى قاسىنا وتىرعىزۋى كەرەك ەدى.

ءجۋرناليستىڭ شەت ءتىلىن بىلمەۋگە قۇقىعى جوق. ال مىنا سۇراق قويعان جۋرناليست قۇرىلىسقا بارسىن. ال ەگەر ول سونداي پاتريوت بولسا, ءباسپاسوز ءماسليحاتىنا نەگە شەتەلدىك كلۋبتىڭ جەيدەسىن كيىپ كەلدى? مەن ءوز ەلىمنىڭ جەيدەسىن كيەر ەدىم», – دەدى چەردانتسەۆ.

ايتا كەتسەك, قازاقستان فۋتبول فەدەراتسياسى قازاق تىلىندە سۇراق قويعان جۋرناليسكە «فرانتسۋزشا سويلەپ تۇرسىڭ با?» دەگەن ءسوزى ءۇشىن ۇلتتىق قۇراما باپكەرى, رەسەيلىك مامان ستانيسلاۆ چەرچەسوۆكە ايىپپۇل سالدى. بۇل تۋرالى قفف پرەزيدەنتى ادىلەت بارمەنقۇلوۆ ايتتى.

«قاتەلىكتەر بار, كەشە عانا جۋرناليستەرمەن سويلەسكەن ەدىك. چەرچەسوۆتىڭ قالجىڭى – شەكتەن شىعۋ. وزىمەن جەكە سويلەسىپ, مەملەكەتتىك ءتىلدىڭ ماڭىزىن ءتۇسىندىردىم. وعان ايىپپۇل سالىندى», – دەدى بارمەنقۇلوۆ «قازاقستان حالىق پارتياسى» فراكتسياسىنىڭ جيىنىندا.

تاسس اگەنتتىگىنىڭ اقپاراتىنشا, قازاقستان فۋتبول فەدەراتسياسى چەرچەسوۆكە 738 400 تەڭگە (200 اەك) ايىپپۇل سالعان.