رەسپۋبليكا كۇنى قارساڭىندا قايىرىمدى جانداردىڭ فورۋمى ءوتتى

فوتو: جەكە قورىنان

استانادا وتكەن ايتۋلى جيىندا مەملەكەتتىك ورگانداردىڭ, قايىرىمدىلىق ۇيىمدارىنىڭ, جەكە سەكتور وكىلدەرى مەن ۆولونتەرلار, مەتسەناتتار باس قوستى,  دەپ جازادى qandastar.kz

بۇل شارا قازاقستان رەسپۋبليكاسى مادەنيەت جانە اقپارات مينيسترلىگى, بىرىڭعاي گرانت وپەراتورى جانە «قازاقستان دامۋ اسسوتسياتسياسى» زاڭدى تۇلعالار قاۋىمداستىعىنىڭ قولداۋىمەن ۇيىمداستىرىلدى. فورۋم ازاماتتار مەن ۇيىمداردىڭ قايىرىمدىلىقتى دامىتۋعا جانە حالىقتىڭ الەۋمەتتىك وسال توپتارىن قولداۋعا قوسقان ۇلەسىن تانۋ الاڭى بولدى دەسەك قاتەلەسپەيمىز.

فورۋم قايىرىمدىلىق جاساپ, ەلدىڭ قۇرمەتىنە بولەنگەن قۇرمەتتى اتاققا لايىق لاۋرەاتتاردى ماراپاتتاۋ راسىمىمەن اشىلدى. مادەنيەت جانە اقپارات ءمينيسترى ايدا بالاەۆا ءوزىنىڭ بەينەجولداۋىندا قازاقستاندا قايىرىمدىلىق جاساۋ مادەنيەتىن دامىتۋدىڭ ماڭىزدىلىعىن اتاپ ءوتتى. ول ءاربىر ازامات وزگەنىڭ ءومىرىن جاقسارتۋعا ءوز ۇلەسىن قوسۋعا قابىلەتتى ەكەنىن, ءارى حالىقتىڭ الەۋمەتتىك وسال توپتارىن قولداۋدا ۇجىمدىق كۇشتىڭ ماڭىزدىلىعىن ايتتى.

“قايىرىمدىلىق جاساساڭ قايىرىن ءوزىڭ كورەسىڭ” دەمەكشى, وتكەن جىلى 80 749 ازاماتقا جالپى سوماسى 39 ميلليارد تەڭگەدەن استام قايىرىمدىلىق كومەك كورسەتىلدى. بۇل كومەكتىڭ نەگىزگى باعىتتارى تۇرعىن ۇيمەن قامتاماسىز ەتۋ, سپورت الاڭدارىن سالۋ جانە دەنساۋلىق ساقتاۋ ينفراقۇرىلىمىن جاقسارتۋ بولدى. تاعدىر تالكەگىنە تۇسكەن جانداردىڭ باسىنان ءوتىپ جاتقان ءارتۇرلى جاعدايلار بار. ولارعا كومەك جاساپ جاتقان جۇرەگى كەڭ, جوققا بەرە الاتىن جومارت جانداردىڭ اتقارىپ جاتقان ەڭبەگى زور ارينە. اعىمداعى جىلى قايىرىمدىلىق سالاسى بويىنشا قۇرمەتتى اتاققا 148 ءوتىنىش تۇسكەن. ونىڭ ىشىندە 27-ءى – قايىرىمدىلىق ۇيىمداردان, 27-ءى – مەتسەناتتاردان, 58-ءى – جەكە قايىرىمدى جانداردان جانە 36-سى – ەرىكتىلەردەن.

ناتيجەسىندە قازاقستاننىڭ ءار ءوڭىرىنىڭ اتىنان شىققان مەتسەناتتاردىڭ ىشىندە 19 لاۋرەاتقا قۇرمەتتى اتاق بەرىلدى. فورۋم بارىسىندا پانەلدىك سەسسيالار ءوتتى.

«قايىرىمدىلىق جانە ESG: تۇراقتى دامۋ ستراتەگيالارى» – بۇل سەسسيادا ESG قاعيداتتارىن قايىرىمدىلىق ۇيىمدارىنىڭ قىزمەتىنە ەنگىزۋدىڭ ءساتتى ۇلگىلەرى ۇسىنىلدى. قايىرىمدىلىق جاساۋ ەرەجەلەرى دە ءسوز بولدى. قاتىسۋشىلار ءتيىمدى جانە تۇراقتى قايىرىمدىلىق جوبالارىن قۇرۋ ءۇشىن ESG پرينتسيپتەرىن قالاي جۇزەگە اسىرۋعا بولاتىنىن كورسەتەتىن بەينەروليكتى تاماشالادى .

ESGQ ديرەكتورى ەرلىك قاراجاننىڭ ايتۋىنشا, قوعامدىق ينستيتۋتتار دەڭگەيىندە دە ادىلدىككە قاتىستى تۇسىنىكسىز كوزقاراس قالىپتاسقان. «ءبىزدىڭ كاسىپكەر رەتىندە ماقساتىمىز ءارتۇرلى دەيتىن بولساق, بۇل بەلگىلى ءبىر قاقتىعىس تۋدىرادى جانە ءبىز قوعام رەتىندە ءاردايىم ۇكىمەتكە دەگەن نارازىلىعىمىز دا ارتىپ وتىرادى» -دەدى ول . سونداي-اق, اگەنتتىگىنىڭ جاڭا ءبىلىم جوباسىن جاريالادى. بۇل بىرەگەي جوبا بيزنەس, ۇكىمەت جانە قوعامدى بىرىكتىرەتىن الاڭ بولماق.

«قايىرىمدىلىق سالاسىنداعى زاڭدار مەن ەرەجەلەر: اشىقتىق پەن سەنىمگە اسەرى» – تاقىرىبىندا وتكەن پانەلدىك سەسسياعا قاتىسۋشىلار ءمادي يسمايلوۆ جانە تەمىرلان ەربوسىنوۆپەن بىرگە قايىرىمدىلىققا دەگەن سەنىمدى ارتتىرۋ ءۇشىن زاڭنامالىق وزگەرىستەردىڭ ماڭىزدىلىعىن جانە كراۋدفاندينگتى دامىتۋ ءۇشىن بىرىگۋ قاجەتتىلىگىن تالقىلادى. ال «شۇعىل كومەك جانە قايىرىمدىلىق: توتەنشە جاعدايلاردا ءۇش جاقتى سەرىكتەستىكتىڭ ءتيىمدى ستراتەگياسىن ازىرلەۋ» تاقىرىبىن تالقىلاۋدا ساراپشىلار توتەنشە جاعدايلارعا جەدەل دەن قويۋدىڭ ماڭىزدىلىعىن ايتتى. زارداپ شەككەندەرگە كومەك كورسەتۋدى ۇيىمداستىرۋعا باعىتتالعان جوبالاردى ۇسىندى. “بولات وتەمۇراتوۆ قورى”-نىڭ ديرەكتورى مارات ايتماعامبەتوۆتىڭ ايتۋىنشا, توتەنشە جاعدايلارعا جەدەل دەن قويۋ وتە ماڭىزدى. العاشقى تاۋلىكتە كومەك كورسەتۋ جىلدامدىعىنىڭ اسەرى مەن ماڭىزى زور. ىزگى جانداردىڭ فورۋمى جەكە سەكتور وكىلدەرىنە, مەتسەناتتار مەن دەمەۋشىلەرگە ارنالعان شەبەرلىك ساباعىمەن اياقتالدى.

وندا فيلانتروپيا سالاسىنداعى تۇراقتى دامۋعا قول جەتكىزۋ ءۇشىن ىنتىماقتاستىق پەن سەرىكتەستىكتىڭ ماڭىزدىلىعى تۋرالى ايتىلدى. قايىرىمدىلىقتىڭ ۇلكەن-كىشىسى بولمايدى. قايىرىمدى بولايىق!