رەسپۋبليكا كۇنىنە وراي قازاقستاندىقتارعا بىرجولعى كومەك بەرىلەدى

ەلىمىزدە 25 قازان – رەسپۋبليكا كۇنىنە وراي از قامتىلعان وتباسىلارعا اكىمدىك تاراپىنان بىرجولعى قارجىلىق كومەك تاعايىندالادى. ال كەي وڭىرلەردە مۇمكىندىگى شەكتەۋلى جاندار مەن اردارگەرلەرگە دە كومەك قورى قاراستىرىلعان. الايدا كەي قالالاردا بيىل بىرجولعى تولەم بيۋدجەتتەن مۇلدەم قاراستىرىلماعان, دەپ حابارلايدى qandastar.kz اقپارات پورتالى Stan.kz-كە سىلتەمە جاساپ.

الەۋمەتتىك تولەم بەرۋ بويىنشا اتىراۋ وبلىسى كوش باسىندا تۇر.  وڭىردە 25 قازان رەسپۋبليكا كۇنىنە وراي مۇگەدەكتىگى بار ادامدارعا, ونىڭ ىشىندە از قامتىلعان وتباسىلارعا, جالعىزباستىلارعا, قارتتارعا, مۇگەدەكتىگى بار بالالارعا 7,5 اەك (2024 جىلى 27 690 تەڭگە) كولەمىندە تولەنبەك.

كەلەسى ورىنعا پاۆلودار وبلىسى ورنالاستى. مۇندا مەرەكە قارساڭىندا وبلىستىڭ بارلىق قالالارى مەن اۋداندارىندا بيۋدجەت قاراجاتى ەسەبىنەن 18 جاسقا دەيىنگى مۇگەدەكتىگى بار بالالارعا, 1 جانە 2 توپتاعى مۇگەدەكتىگى بار ادامدارعا – 5 اەك مولشەرىندە بىرجولعى تولەمدەر (18 500 تەڭگە) قاراستىرىلادى. وبلىس بويىنشا بۇل ءىس-شاراعا 18 مىڭنان استام ادام قامتىلادى.

ءدال مۇنداي سومانى ماڭعىستاۋلىقتار الماق. تەك مۇگەدەكتىگى بار ەرەسەكتەر مەن  مۇگەدەكتىگى بار بالالارعا 5 اەك بەرىلەدى (18 500 تەڭگە) ايتا كەتەيىك, بيىل 1 مرپ – 3 692 تەڭگە.

ال  ۇلىتاۋ وبلىسىندا بىرىنشى, ەكىنشى جانە ءۇشىنشى توپتارداعى مۇگەدەكتىگى بار ادامدارعا, 7 جاسقا دەيىنگى مۇگەدەكتىگى بار بالالارعا جانە ءبىرىنشى, ەكىنشى, ءۇشىنشى توپتاعى 7 جاستان 18 جاسقا دەيىنگى مۇگەدەكتىگى بار بالالارعا – 20 000 تەڭگە كولەمىندە ءبىر رەتتىك الەۋمەتتىك كومەك تولەنەدى. وبلىس بويىنشا 11 536 مۇگەدەكتىگى بار ادامدارعا بارلىعى 230 720,0 مىڭ تەڭگە كولەمىنە بەرىلەدى.

بۇدان بولەك استانا ءماسليحاتىنىڭ 2023 جىلعى 3 قازانداعى № 84/10-VIII شەشىمىمەن بەكىتىلگەن «الەۋمەتتىك كومەك كورسەتۋ, مولشەرىن بەلگىلەۋ جانە الەۋمەتتىك وسال ازاماتتاردىڭ ءتىزىمىن انىقتاۋ ەرەجەلەرىنە» سايكەس از قامتىلعان ازاماتتارعا 4,5 اەك (16 614 تەڭگە) كولەمىندە تولەمدەر جاسالادى.

مۇنداي كومەك قولى قىزىلوردالىقتارعا دا بەرىلەدى. بيىل العاش رەت وبلىس بويىنشا بارلىق ساناتتاعى مۇگەدەكتىگى بار ادامدار مەن مۇگەدەكتىگى بار بالالارعا ارقايسىسىنا 3 ايلىق ەسەپتىك كورسەتكىش (11 076 تەڭگە) مولشەرىندە ءبىر رەتتىك الەۋمەتتىك كومەك بەرۋگە وبلىستىق بيۋدجەتتەن قارجى ءبولىندى.

اقمولا وبلىسىندا زەينەتكەرلەردىڭ جالپى سانى 115 315 ادامدى قۇرايدى. بيىل وبلىستا زەينەتكەرلەر مەن مۇگەدەكتەرگە الەۋمەتتىك قولداۋ كورسەتۋ بويىنشا شامامەن 39 860 ادامدى قامتۋ جوسپارلانىپ وتىر. بۇل ماقساتتا جالپى سوماسى – 439 045,0 مىڭ تەڭگە بولىنەدى.

الايدا اباي, الماتى, جەتىسۋ, جامبىل, قاراعاندى, قوستاناي, سولتۇستىك قازاقستان, تۇركىستان, اقتوبە, شىعىس قازاقستان, باتىس قازاقستان وبلىستارىندا جانە الماتى, شىمكەنت قالالارىندا بىرجولعى تولەم قاراستىرىلماعان.