Respýblıka kúnine oraı qazaqstandyqtarǵa birjolǵy kómek beriledi

Elimizde 25 qazan – Respýblıka kúnine oraı az qamtylǵan otbasylarǵa ákimdik tarapynan birjolǵy qarjylyq kómek taǵaıyndalady. Al keı óńirlerde múmkindigi shekteýli jandar men ardargerlerge de kómek qory qarastyrylǵan. Alaıda keı qalalarda bıyl birjolǵy tólem bıýdjetten múldem qarastyrylmaǵan, dep habarlaıdy qandastar.kz aqparat portaly Stan.kz-ke silteme jasap.

Áleýmettik tólem berý boıynsha Atyraý oblysy kósh basynda tur.  О́ńirde 25 qazan Respýblıka kúnine oraı múgedektigi bar adamdarǵa, onyń ishinde az qamtylǵan otbasylarǵa, jalǵyzbastylarǵa, qarttarǵa, múgedektigi bar balalarǵa 7,5 AEK (2024 jyly 27 690 teńge) kóleminde tólenbek.

Kelesi orynǵa Pavlodar oblysy ornalasty. Munda mereke qarsańynda oblystyń barlyq qalalary men aýdandarynda bıýdjet qarajaty esebinen 18 jasqa deıingi múgedektigi bar balalarǵa, 1 jáne 2 toptaǵy múgedektigi bar adamdarǵa – 5 AEK mólsherinde birjolǵy tólemder (18 500 teńge) qarastyrylady. Oblys boıynsha bul is-sharaǵa 18 myńnan astam adam qamtylady.

Dál mundaı somany mańǵystaýlyqtar almaq. Tek múgedektigi bar eresekter men  múgedektigi bar balalarǵa 5 AEK beriledi (18 500 teńge) Aıta keteıik, bıyl 1 MRP – 3 692 teńge.

Al Ulytaý oblysynda birinshi, ekinshi jáne úshinshi toptardaǵy múgedektigi bar adamdarǵa, 7 jasqa deıingi múgedektigi bar balalarǵa jáne birinshi, ekinshi, úshinshi toptaǵy 7 jastan 18 jasqa deıingi múgedektigi bar balalarǵa – 20 000 teńge kóleminde bir rettik áleýmettik kómek tólenedi. Oblys boıynsha 11 536 múgedektigi bar adamdarǵa barlyǵy 230 720,0 myń teńge kólemine beriledi.

Budan bólek Astana máslıhatynyń 2023 jylǵy 3 qazandaǵy № 84/10-VIII sheshimimen bekitilgen «Áleýmettik kómek kórsetý, mólsherin belgileý jáne áleýmettik osal azamattardyń tizimin anyqtaý erejelerine» sáıkes az qamtylǵan azamattarǵa 4,5 AEK (16 614 teńge) kóleminde tólemder jasalady.

Mundaı kómek qoly qyzylordalyqtarǵa da beriledi. Bıyl alǵash ret oblys boıynsha barlyq sanattaǵy múgedektigi bar adamdar men múgedektigi bar balalarǵa árqaısysyna 3 aılyq eseptik kórsetkish (11 076 teńge) mólsherinde bir rettik áleýmettik kómek berýge oblystyq bıýdjetten qarjy bólindi.

Aqmola oblysynda zeınetkerlerdiń jalpy sany 115 315 adamdy quraıdy. Bıyl oblysta zeınetkerler men múgedekterge áleýmettik qoldaý kórsetý boıynsha shamamen 39 860 adamdy qamtý josparlanyp otyr. Bul maqsatta jalpy somasy – 439 045,0 myń teńge bólinedi.

Alaıda Abaı, Almaty, Jetisý, Jambyl, Qaraǵandy, Qostanaı, Soltústik Qazaqstan, Túrkistan, Aqtóbe, Shyǵys Qazaqstan, Batys Qazaqstan oblystarynda jáne Almaty, Shymkent qalalarynda birjolǵy tólem qarastyrylmaǵan.