«روساتوم» تۇركياداعى اەس-كە قاتىستى كومپانيانى سوتقا بەرمەك

فوتو:Wikimedia

«روساتوم» تۇركيادا سالىنىپ جاتقان «اككۋيۋ» اەس-ءىنىڭ قۇرىلىسىنىڭ توقتاپ قالۋىنا سەبەپ بولعانى ءۇشىن گەرمانيالىق Siemens كومپانياسىن سوتقا بەرمەك. بۇل تۋرالى «روساتومنىڭ» اتقارۋشى ديرەكتورى الەكسەي ليحاچەۆ ايتقان, دەپ جازادى qandastar.kz

«بۇل ماسەلەگە قاتىستى سوت بولاتىنى انىق. اقشاسى الدىن-الا تولەنگەن جابدىق جەتكىزىلمەدى. سالدارىنان ءبىز قوسىمشا شىعىنعا ۇشىراپ, باسقا جابدىق ساتىپ الۋعا تۋرا كەلدى. سونىمەن بىرگە بۇل جابدىق مونتاجىنا دا ءبىرشاما ۋاقىت كەتتى. ءبىز بۇل تالاپتاردى سوتتا كوتەرەمىز», – دەپ مالىمدەگەن ليحاچەۆ.

kz.kursiv.media حابارلاعانداي, كومپانيا باسشىسى سانكتسيالارعا قاراماستان, شەتەلدەگى جوبالاردىڭ ۋاقتىلى جۇرگىزىلىپ جاتقانىن ايتقان. «روساتوم» بۇدان بولەك بانگلادەشتە جانە مىسىردا اەس جوبالارىنا قاتىسادى.

ايتا كەتەيىك, «روساتوم» قازاقستانداعى اەس جوباسىنا دا قاتىسۋى مۇمكىن. ەلدە اتوم ەلەكتر ستانتسياسىن سالۋ ءۇشىن 5 ەلدەن تۇراتىن كونسورتسيۋم قۇرىلادى. ول كونسورتسيۋمعا قىتاي, رەسەي, وڭتۇستىك كورەيا جانە فرانتسيا كومپانيالارى كىرەدى. كونسورتسيۋم قۇرىلعان سوڭ, قازاقستان تاراپى قاي ەلدەن اەس-كە قاجەتتى قانداي جابدىقتار جەتكىزىلەتىنىن انىقتايتىن بولادى.

قازىرگى ۋاقىتتا «CNNC» (قحر, HPR-1000 رەاكتورى), «روساتوم» (رف, ۆۆەر-1200 رەاكتورى), «KHNP» (وڭتۇستىك كورەيا, APR-1000, APR-1400 رەاكتورلارى), «EDF» (فرانتسيا, EPR1200 رەاكتورى) سياقتى الەۋەتتى جەتكىزۋشىلەرىمەن كەلىسسوز باستالعان. كەلىسسوزدەر باسەكەلەستىك ديالوگ راسىمىندە جۇرگىزىلىپ جاتىر.