روساۆياتسيا اقتاۋدا قۇلاعان ۇشاققا قاتىستى مالىمدەمە جاسادى

بۇل تۋرالى روساۆياتسيا باسشىسى دميتري يادروۆتىڭ اقتاۋداعى ۇشاق اپاتىنا بايلانىستى العاش رەت جاساعان مالىمدەمەسىندە ايتىلعان, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

25 جەلتوقساندا گروزنىي اۋە كەڭىستىگى Azerbaijan Airlines ۇشاعى اپاتقا ۇشىراعان كەزدە ۋكراينالىق درونداردىڭ شابۋىلىنا بايلانىستى جابىلعان.

«سول كۇنى جانە سول ۋاقىتتاعى ساعاتتاردا گروزنىي اۋەجايىنىڭ ماڭىنداعى احۋال وتە قيىن بولدى. ۋكراينالىق اسكەري دروندار سول ۋاقىتتا گروزنىي مەن ۆلاديكاۆكازداعى ازاماتتىق ينفراقۇرىلىمعا تەرروريستىك شابۋىلدار جاساۋعا تىرىستى. وسىعان بايلانىستى گروزنىي اۋەجايىنىڭ ماڭىندا بارلىق اۋە كەمەلەرىنىڭ اتالعان كەڭىستىكتەن دەرەۋ كەتۋىن كوزدەيتىن «كوۆەر» رەجيمى ەنگىزىلدى», – دەدى يادروۆ.

سوزىنشە, گروزنىي اۋەجايىنىڭ ماڭىندا قالىڭ تۇمان بولعان جانە 500 مەتر بيىكتىكتە ەشتەڭە كورىنبەگەن.

بۇدان باسقا روساۆياتسيا باسشىسى اپاتقا ۇشىراعان Embraer ۇشاعىنىڭ كومانديرى اۋە كەمەسىن گروزنىيدا ەكى رەت قوندىرۋعا ارەكەت جاساعانىمەن, ول ءساتسىز اياقتالعانىن مالىمدەدى.

«كومانديرگە باسقا اۋەجايلار ۇسىنىلدى. ول اقتاۋ اۋەجايىنا بارۋ تۋرالى شەشىم قابىلدادى», – دەدى ول.

دميتري يادروۆ قازاقستان مەن ازەربايجانمەن بىرلەسىپ «تەرگەۋدى قاجەت ەتەتىن كوپتەگەن جاعداي» بار ەكەنىن العا تارتتى. سونداي-اق رەسەي تاراپى تەرگەۋدە ىنتىماقتاستىق جاساۋعا دايىن ەكەنىن ءبىلدىردى.