رۋسلان بەردەنوۆ وققا ۇشىپ, اۋرۋحانادا جاتىر

فوتو: remedial

21 ءساۋىر كۇنى كەشكى ساعات 20:30 شاماسىندا شىمكەنت قالالىق اكىمدىگىنىڭ ماڭىندا قالا اكىمىنىڭ ورىنباسارى رۋسلان بەردەنوۆكە قاستاندىق جاسالدى, دەپ جازدى qandastar.kz 

كەيبىر دەرەككوزدەرگە سەنسەك, شىمكەنت قالاسى اكىمدىگىنە قاراستى «تۇرعىن ءۇي شىمكەنت» جشس-ءنىڭ مامانى ەرنار جيەنباي ۇلى قالا اكىمىنىڭ ورىنباسارى رۋسلان بەردەنوۆكە «سايگا-12» اڭشى مىلتىعىنان ءۇش رەت وق اتقان. 

وقيعا اكىمدىك عيماراتىنىڭ ماڭىندا بولىپ, وق شەنەۋنىكتىڭ دەنەسىنىڭ تومەنگى بولىگىنە تيگەن. بەردەنوۆ اۋىر جاراقات العان. شۇعىل تۇردە اۋرۋحاناعا جەتكىزىلگەن شەنەۋنىككە قازىر مەديتسينالىق كومەك كورسەتىلۋدە.

قۇقىق قورعاۋ ورگاندارىنداعى سەنىمدى دەرەككوزدىڭ حابارلاۋىنشا, وق اتقان ازامات وقيعا ورنىندا ۇستالعان. 

Ertenmedia.kz وقيعانىڭ ءمان-جايىن انىقتاۋ ماقساتىندا ىشكى ىستەر مينيسترلىگىنە, شىمكەنت قالالىق پوليتسيا دەپارتامەنتىنە, سونداي-اق رۋسلان بەردەنوۆ مۇشەسى بولىپ تابىلاتىن «رەسپۋبليكا» پارتياسىنىڭ ءباسپاسوز قىزمەتىنە رەسمي ساۋال جولدادى.

ايتا كەتەيىك, رۋسلان بەردەنوۆ شىمكەنت قالاسى اكىمىنىڭ ورىنباسارى قىزمەتىنە بيىل اقپان ايىندا عانا تاعايىندالعان بولاتىن.