رۋسلان بەردەنوۆكە جاسالعان قاستاندىق: شىمكەنتتە سوت وتىرىسى باستالدى

فوتو: t.me/mazhilis_kz

شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قالا اكىمىنىڭ ورىنباسارى رۋسلان بەردەنوۆكە جاسالعان قاستاندىققا قاتىستى ءىس بويىنشا الدىن الا تىڭداۋ باستالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ايتا كەتەيىك, بۇل ىستە قالا تۇرعىنى ەرنار جيەنباي كۇدىكتى رەتىندە تانىلعان. ءىس بويىنشا الدىن الا تىڭداۋ اشىق رەجيمدە, مەمەلكەتتىك تىلدە وتىپ جاتىر. سۋديا سوت وتىرىسى كەزىندە سوتتالۋشى ءوزىن فوتو جانە ۆيدەوعا تۇسىرۋگە قارسىلىق بىلدىرگەنىن اتاپ ءوتتى.

«تاراپتاردىڭ پىكىرىن ەسكەرە وتىرىپ, سوتتالۋشىنى تۇسىرۋگە تىيىم سالىنادى», – دەدى سۋديا ءابينۇر قاراباەۆ.

بۇل ءىس بويىنشا باستى سوت وتىرىسى 6 تامىز 10:00-گە بەلگىلەندى.

بۇعان دەيىن ەرنار جيەنبايعا قاتىستى قىلمىستىق ءىس سوتقا كەلىپ تۇسكەنى حابارلانعان ەدى. ول قىلمىستىق كودەكستىڭ 24-بابىنىڭ 3-بولىگى (قىلمىسقا دايىندالۋ جانە قىلمىسقا وقتالۋ) جانە 99-باپتىڭ 1-بولىگى (ادام ءولتىرۋ) بويىنشا ايىپتالۋدا.

ەسكە سالساق, 22 ساۋىرگە قاراعان ءتۇنى شىمكەنت اكىمىنىڭ ورىنباسارى رۋسلان بەردەنوۆكە قاستاندىق جاسالعانى تۋرالى اقپارات تارادى. ول  جامباس جانە يىق تۇسىنان وق جاراقاتىن الىپ, اۋرۋحاناعا جەتكىزىلدى. وعان شۇعىل تۇردە وتا جاسالدى. شابۋىلدىڭ الدىن الا سەبەبى رەتىندە بىرنەشە نۇسقا ايتىلدى. ءبىرى رۋسلان بەردەنوۆ شابۋىل جاساعان ادامنىڭ ايەلىنە ءتيىستى دەسە, ەندى ءبىرى بۇل جاعدايدى شىمكەنتتەگى قۇرىلىس سالاسىنداعى بىلىقتارمەن بايلانىستىردى. كەيىنىرەك اكىمدىك وكىلدەرى شابۋىل جاساعان ادام ۇستالىپ, ۋاقىتشا ۇستاۋ يزولياتورىنا قامالعانىن مالىمدەدى.

22 ساۋىردە رۋسلان بەردەنوۆكە قاستاندىق جاساعان دەپ كۇدىكتەلگەن ەرنار جيەنباي تۋرالى دەرەكتەر تاراي باستادى. وندا جيەنباي بەردەنوۆتى قىزمەتىنەن بوساتپاق بولعانى ءۇشىن كەك الۋ ماقساتىندا اتقانى ايتىلعان.

كەيىن ەرنار جيەنبايدىڭ اكەسى مالىمدەمە جاساپ, تەرگەۋ مەن سوت ءادىل تۇردە ءىستىڭ بارلىق ءمان-جايىن انىقتايتىنىنا سەنىم ءبىلدىردى. سونىمەن قاتار حالىقتان اسىعىس قورىتىندى جاساماۋدى جانە ەموتسياعا بەرىلمەۋدى سۇرادى.