«رىجي المازدىڭ ۇلىمىن»: اقبەرەن ەلگەزەك جەكە ومىرىنە قاتىستى قۇپيانىڭ بەتىن اشتى

فوتو: Caravan.kz

اقىن اقبەرەن ەلگەزەك جەكە ءومىرى تۋرالى سىر شەرتىپ, ەش جەردە ايتىلماعان قۇپيانىڭ بەتىن اشتى, دەپ qandastar.kz اقپارات پورتالى Caravan.kz-كە سىلتەمە جاساپ حابارلايدى.

اقبەرەن ەلگەزەك 90-شى جىلدارى قىلمىس الەمىندەگى تانىمال بولعان رىجي المازدىڭ جەرلەسى. اقىننىڭ سوزىنە سەنسەك, ەرتەرەكتە اياگوزدىك جاستار وزدەرىن «رىجي المازدىڭ» ۇلىمىز دەگەن رومانتيكامەن وسكەن.

«ءبىر تۇلەن ءتۇرتىپ, رىجي الماز مەنىڭ اكەم دەپ ايتقان ءسات بولعان. ءبىر ازاماتتار مەنى شاقىرىپ الىپ, رىجي المازدى تانيسىڭ با دەدى. مەن تانيمىن, اكەم عوي دەگەن ءسوز اۋزىمنان شىعىپ كەتتى. ءالى كۇنگە دەيىن نەگە ولاي ايتقانىمدى بىلمەيمىن. سوسىن ولار ءبىر-بىرىنە قاراپ, ايتتىق قوي ۇقسايدى دەپ دەدى. ماعان اۆتوكولىك, ءۇي بەرەمىن دەدى. بىراق, مەن باس تارتتىم, سۇراۋى بار عوي, ونى انىقتايدى. سودان كەيىن ول كىسى اياگوزدىكى بولعاننان كەيىن بالالارى ەسەبىندە, سونداي رومانتيكامەن وستىك قوي دەپ ايتتىم. سوسىن بولدى باۋىرىم, كەتە بەر دەدى», — دەيدى ول نۇرسەيىت جىلقىشىبايعا بەرگەن سۇحباتىندا.

سونداي-اق, اقىن دەپۋتات بولۋعا ۇسىنىس تۇسكەنىن, بىراق ودان باس تارتقانىن دا جاسىرمادى.

«ەرلان قارين جاڭا پارلامەنت جاساقتالايىن دەپ جاتىر. سول جەردە ءبىزدىڭ جاڭا قازاقستانعا كەرەكتى زاڭداردى قابىلداۋ كەرەك. جاپونيا سياقتى ەلدەردە پارلامەنتتە توبەلەس بولىپ جاتادى عوي, بىزدە دە سونداي بولۋ كەرەك دەدى. سوعان سەن سياقتى مىقتى جىگىتتەر جاڭا زاڭدى قابىلداۋ كەرەك دەدى. مەن ەرەكە, مەن ادەبيەتتىڭ ادامىمىن. دەنساۋلىق ساقتاۋ, ەكونوميكاعا قاتىستى زاڭدار كەلسە, مەن نە ىستەيمىن. جازۋشىلار وداعىندا جۇرە بەرەيىن, پارلامەنتكە دايىن ەمەسپىن دەدىم», — دەيدى ول.

رىجي الماز دەگەن لاقاپ اتپەن قىلمىس الەمىندە كەڭ تانىلعان تۇلعانىڭ شىن ەسىمى – نەسىپباي ناسەنوۆ. ول 1961 جىلى سەمەي وڭىرىندە دۇنيەگە كەلگەن. 1990 جىلدارى قازاقستانداعى ۇيىمداسقان قىلمىس قۇرىلىمدارىنىڭ بەلدى مۇشەسى رەتىندە تانىمال بولدى.