جاڭالىقتار
سابيىنە قۇنانباي مەن اباي ەسىمىن قويعاندارعا 180-300 مىڭ تەڭگەدەن بەرىلەدى
فوتو: pexel
مۇنداي باستامانى كاسىپكەر دۋلات تاستەكەي مەن جۋرناليست نۇرسەيىت جىلقىشىباي كوتەرىپ وتىر, دەپ حابارلايدى qandastar.kz
جۋرناليست نۇرسەيىت جىلقىشىباي جازۋىنشا, كاسىپكەر دۋلات تاستەكەي ۇلى ابايدىڭ 180 جىلدىعىنا بايلانىستى وسىنداي باستاما كوتەرگەن. 2025 جىلدىڭ 10 تامىز كۇنى دۇنيە ەسىگىن اشقان بارلىق ابايلارعا 180 مىڭ تەڭگەدەن بەرمەك.
«اسىلتاس قورىنىڭ بۇل باستاماسىن مەن دە ءوز شاما-شارقىمشا قولدايمىن. بىراق… قازاقتا اباي دەگەن ات از ەمەس. ال قۇنانباي شە? الدا ءبىر جازعانىمداي قۇنانباي, دونەنتاي, تۇرسىن سىندى قازىر قازاقى اتتار قويىلماي كەتتى. ەسەسىنە ارابشا اتتار قاپتادى. بۇل ءبىر. ەكىنشىدەن ابايدىڭ اباي بولۋىنا ىقپال ەتكەن اكەسى. ەمەندەي بەرىك, بايتەرەكتەي زور قۇنانباي! قارادان شىعىپ حان بولعان. ادىلدىكتى قاق جارعان شەشەن ءارى بالۋان بولعان تۇلعا!», – دەيدى ول.
Skifnews.kz جازعانداي, جۋرناليست ۇلىنىڭ اتىن قۇنانباي دەپ قويعان ون ادامعا «الامان» كومپانياسىنىڭ اتىنان 3 ملن تەڭگە بولمەك.
«ياعني بالاڭىزدىڭ اتىن قۇنانباي دەپ قويساڭىز 300 مىڭ تەڭگەنى بىردەن شوتىڭىزعا اۋدارىپ جىبەرەم. ول ءۇشىن مىنا ءنومىردىڭ ۆاتسابىنا 8-707-179-79-42 دالەلدەيتىن تۋ تۋرالى كۋالىكتى جىبەرسەڭىز بولعانى. بۇل شارا 1 ناۋرىزدان باستالادى. وعان دەيىن بارىنشا رەپوست جاساپ قولداپ جىبەرسەڭىزدەر! اتا-انا اتانعالى وتىرعان جاندارعا حابارىمىز جەتسە ەكەن دەيمىز. ارينە كەيىن بۇل شارانىڭ ەسەبىن وزدەرىڭىزگە بەرەمىن. ون ءسابي قۇنانبايدى وزدەرىڭىزگە تانىستىرامىن. سىزدەر اق تىلەكتەرىڭىزدى ايتاسىزدار!», – دەيدى ول.
