Sábıt Muqanov Baýyrjan Momyshulyna qandaı baǵa bergen?

Foto: ashyq derekkóz

Jazýshy, ádebıet synshysy, Memlekettik syılyqtyń ıegeri Qulbek Ergóbek Adal Adal youtube arnasyna bergen suhbatynda Baýyrjan Momyshulyna Sábıt Muqanovtyń bergen baǵasy týraly aıtty, dep jazdy qandastar.kz

«Baýyrjan Momyshuly a dep aýzyn ashsa, aforızm atyp ketetin adam edi, halqyn keremet súıgen adam. Baýyrjan Momyshuly qan maıdannan shyǵyp, Almatyǵa kele jatqanda Sábıt Muqanov aıtqan eken «Kishi Bókeıhanov» kele jatyr» dep. Ne degen baǵa?! Ol kezeńde qaýipti, qaterli baǵa edi. Baýkeń osyny aıtyp, birde maqtanatyn, birde «Sábıt Muqanov meni ustatyp jibereıin dep aıtty ma eken» dep taǵy da aǵasyna ókpelep otyratyn. Birde meni jazýshy etken Sábıt aǵam dep jazady, ekinshi bir sózinde Sábıt Muqanov Alashordany qurtqan adam degendi jazady. Qysqasy, dúnıetanymy da qaıshylyqty. Adam retinde, jazýshy retinde, áskerı ǵylymnyń doktory retinde, soǵysqa qatysqan, dıvızııa basqarǵan qolbasshy retinde Baýyrjan Momyshuly qashanda bıikte qala beredi. Onyń kemshiligine keshirimmen qaraýymyz kerek te, ulylyǵyn júregimizge uıalata bilýimiz kerek», — dedi jazýshy-ǵalym.