سادراددين «دارىن» جاستار سىيلىعىن الدى

فوتو: sn.kz

استانادا «تاۋەلسىزدىك ۇرپاقتارى» گرانتتار كونكۋرسى مەن «دارىن» جاستار سىيلىعىنىڭ جەڭىمپازدارى انىقتالدى. بۇل تۋرالى مادەنيەت جانە اقپارات مينيسترلىگىنىڭ ءباسپاسوز قىزمەتى ءمالىم ەتتى, دەپ جازدى qandastar.kz

بۇگىن استانادا مەملەكەت باسشىسىنىڭ تاپسىرماسىمەن قۇرىلعان «تاۋەلسىزدىك ۇرپاقتارى» گرانتتار كونكۋرسىنىڭ جەڭىمپازدارى مەن مەملەكەتتىك «دارىن» جاستار سىيلىعىنىڭ لاۋرەاتتارىن ماراپاتتاۋ ءراسىمى ءوتتى.

بيىلعى «دارىن» سىيلىعىنىڭ جەڭىمپازدارى قاتارىندا ءتۇرلى بايقاۋلار مەن فەستيۆالدەردىڭ لاۋرەاتتارى, سپورتتىق جارىستاردىڭ جەڭىمپازدارى, قوعام قايراتكەرلەرى مەن بەلسەندىلەر بار.

كاسىبي قازىلار القاسى لاۋرەاتتاردى «ادەبيەت», «عىلىم», «ديزاين جانە بەينەلەۋ ونەرى», «جۋرناليستيكا», «كلاسسيكالىق مۋزىكا», «كرەاتيۆتى باستامالار», «سپورت», «تەاتر جانە كينو», «ەسترادا» جانە «حالىق شىعارماشىلىعى» نوميناتسيالارى بويىنشا تاڭدادى.

ماراپاتتاۋ كەزىندە قر مادەنيەت جانە اقپارات ءمينيسترى ايدا بالاەۆا ەلدە ورتاق پرينتسيپتەر مەن ماقساتتاردى ۇستاناتىن پروگرەسسيۆتى ءارى دارىندى بۋىننىڭ ءوسىپ كەلە جاتقانىن اتاپ ءوتتى.

– سىزدەر – حالىقتىڭ ءۇمىتى مەن تىرەگىسىزدەر. ەل پرەزيدەنتى جاستار ءۇشىن ءۇش باستى باعداردى ۇنەمى ايتىپ كەلەدى – بۇل بىلىمگە ۇمتىلۋ, ەڭبەكقورلىق جانە پاتريوتيزم. بۇل – مىقتى ءارى تابىستى ۇلتتىڭ نەگىزى بولاتىن ءۇش تۇعىر. دەمەك, ۇلتتىڭ بولاشاعىن سىزدەر ايقىندايسىزدار. سوندىقتان مەملەكەت باسشىسى سىزدەرگە ۇلكەن ءۇمىت ارتادى. مەملەكەت ءوز تاراپىنان جاستاردى جان-جاقتى قولداۋدى جالعاستىرادى, – دەدى مينيستر.

«تاۋەلسىزدىك ۇرپاقتارى» گرانتىنىڭ يەگەرلەرى رەتىندە ۇزدىك جوبالاردى ۇسىنعان 30 جاس قازاقستاندىق تاڭدالدى. بۇل جوبالار مادەنيەت, عىلىم, مەديا, اقپاراتتىق تەحنولوگيالار, بيزنەس سالالارىن قامتيدى. بيىل بايقاۋعا جاڭا «ۆولونتەرلىك» دەپ اتالاتىن باعىت قوسىلدى.

– بۇل گرانت مەملەكەت باسشىسى قاسىم-جومارت توقاەۆتىڭ تاپسىرماسىمەن قۇرىلدى. سوندىقتان بۇگىنگى ماراپاتتارىڭىز – ۇلكەن جاۋاپكەرشىلىك. ەل پرەزيدەنتىنىڭ سەنىمىن اقتايتىندارىڭىزعا شىن جۇرەكتەن سەنەمىن. ءاردايىم بيىكتەردەن كورىنىڭىزدەر!, – دەدى ايدا بالاەۆا.

ءوز سوزىندە مينيستر جاستارعا ەگەمەندىك پەن ەلدىكتى نىعايتۋداعى نەگىزگى قۇندىلىقتار تۋرالى ايتتى.

– پرەزيدەنتىمىز بيىلعى ۇلتتىق قۇرىلتايدا ەلىمىز ءۇشىن ماڭىزدى بىرنەشە قۇندىلىقتى اتاپ وتكەن ەدى. ول قۇندىلىقتار – تاۋەلسىزدىك جانە وتانشىلدىق, بىرلىك پەن ىنتىماق, ادىلدىك جانە جاۋاپكەرشىلىك, زاڭ مەن ءتارتىپ, ەڭبەكقورلىق جانە كاسىبي بىلىكتىلىك, جاسامپازدىق پەن جاڭاشىلدىق. مەملەكەت باسشىسى بەلگىلەپ بەرگەن ناقتى قۇندىلىقتاردى ۇستانۋ – جاستاردىڭ دامۋىنا, قوعامدىق سانانىڭ وزگەرۋىنە وڭ ىقپال ەتەرى انىق, – دەدى مينيستر.

ايتا كەتەيىك, «تاۋەلسىزدىك ۇرپاقتارى» كونكۋرسىنىڭ ءار جەڭىمپازىنا 3 ملن تەڭگە كولەمىندە جۇلدە بەرىلدى. بيىل كونكۋرسقا 1284 ءوتىنىم ءتۇسىپ, ونىڭ 897-ءسى قابىلداندى.

مەملەكەتتىك «دارىن» جاستار سىيلىعىنىڭ 20 جەڭىمپازىنا «دارىن» مەملەكەتتىك جاستار سىيلىعىنىڭ لاۋرەاتى» اتاعى بەرىلىپ, ەستەلىك ستاتۋەتكالار مەن اقشالاي سىيلىقتار تابىستالدى.