«ساحناعا قويمەن شىعارسا, بىرگە ماڭىراپ تۇرا بەرەدى»: اقبوتا كەرىمبەكوۆا ءان ايتقان مۇرات ءابدىلدانى سىنادى

فوتو: جەكە پاراقشالاردان الىندى 

تانىمال ءانشى اقبوتا كەرىمبەكوۆا ۇلكەن مادەني ورىندا ءان سالعان اۋەسقوي ءانشى, بلوگەر مۇرات ءادىلدانى سىنادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ونەر يەسى رەسپۋبليكا كۇنىنە وراي وتكەن كونتسەرتتە مۇرات ءابىلدانىڭ ءان ايتۋى سوراقىلىققا جاتادى دەپ ەسەپتەيدى.

“بىرنەشە كۇن بۇرىن الەۋمەتتىك جەلىدە مۇرات ءابىلدا دەگەن ادامنىڭ رەسپۋبليكا سارايىندا ءان سالىپ تۇرعان ۆيدەوسى تارادى. ويلاڭىزشى, رەسپۋبليكا سارايىندا. ەلىمىزدىڭ تاريحي-مادەني ماڭىزدى نىسانىندا! قازاقتىڭ مىڭداعان تالانتى سول ساحناعا شىعۋدى ارمانداعان, مىڭداعان دارىندى قازاق سول ساحناعا شىعا الماي, ارماندا كەتتى. ول جىگىت ەلدىڭ ازى مەن توزى ەمەس شىعار, ونىڭ ادامي كەسكىن-كەلبەتىنە ءتىلىمدى تيگىزە المايمىن. ءبىر جاعىنان قاراعاندا ونىڭ رەسپۋبليكا سارايىندا ءان سالعانى قىلمىس تا ەمەس شىعار. مەنىڭ ايتارىم باسقا”, – دەپ باستادى اڭگىمەسىن ءانشى.

ءانشىنىڭ سوزىنشە, جەلى ارقىلى تانىلعان بلوگەر-ءانشىنىڭ مادەني ورىندا توبە كورسەتۋى ابەستىك كورىنەگەن.

“رەسپۋبليكا سارايىنىڭ ساحناسى روزا باعلانوۆا سەكىلدى اڭىز ادامنىڭ ماڭداي تەرىمەن سالىنعان. ول ساحناعا شىعۋ ءۇشىن بىزدەن مىڭ ەسە لايىق ءارى تالانتتىراق ادامدار تاعدىرىن ارنادى عوي, ءبىزدىڭ ءوزىمىز مۋزىكا مەكتەبىندە وقىپ, ونەر اكادەمياسىندا كاسىبي داعدىمىزدى قالىپتاستىرىپ, 30 جىلعا جۋىق تىنىمسىز ەڭبەك ەتىپ كەلە جاتساق تا, تىزەمىز دىرىلدەپ, زورعا شىعامىز. ەندى سول ۇلتتىق مىنبەرگە شىققىسى كەلگەننىڭ ءبارى شىعا بەرە مە?! وسى شەنەۋنىكتەر وزدەرىنە كەلگەندە قۇقىق تالاپ ەتكىش, ار ساقتاعىش, ءدال سولاي نەگە مەملەكەتتىڭ باس ساحناسىن ساقتامايدى?! ارىپتەستەرىمىز دە ءۇنسىز وتىر. ساحناعا قويمەن شىعارسا, ماڭىراپ تۇرا بەرەتىندەي. ارلانبايدى. مادەنيەت سالاسىنىڭ ارى دا, نامىسى دا – ساحنا. ساحناعا شىعارعان ادامىنا, ساحنادا كورسەتكەن دۇنيەسىنە قاراپ سالانىڭ دەڭگەيىن كورۋگە بولادى”, – دەپ رەنجىدى ونەر يەسى.

ەسكە سالايىق, اقبوتا كەرىمبەكوۆا نۇربولات ابدۋللين مەن قايرات نۇرتاستى سالىستىرعانىن جازعان ەدىك.