جاڭالىقتار
سالتانات نۇكەنوۆانىڭ قايتىس بولعانىنا ءبىر جىل: اتىشۋلى ءىس تۋرالى نە بەلگىلى?
فوتو: اشىق دەرەككوز
ءبىر جىل بۇرىن 9 قاراشادا سالتانات نۇكەنوۆا قايتىس بولدى. ونىڭ ءولىمى قازاقستاندىقتاردى عانا ەمەس, وزگە ەلدەردى دە ءدۇر سىلكىندىردى, – دەپ حابارلايدى qandastar.kz Massaget.kz تىلشىسىنە سىلتەمە جاساپ.
سالتانات نۇكەنوۆانىڭ ءولىمى كەيىنگى جىلدارداعى قازاقستانداعى ەڭ اتىشۋلى ىستەردىڭ ءبىرى بولدى. بۇل تراگەديا ەلدەگى تۇرمىستىق زورلىق-زومبىلىق ماسەلەسىن اشىق كورسەتتى.
بيشىمباەۆ پەن نۇكەنوۆانىڭ تانىستىعى
بۇرىنعى ۇلتتىق ەكونوميكا ءمينيسترى قۋاندىق بيشىمباەۆ پەن سالتانات نۇكەنوۆا 2022 جىلى تامىزدا تانىسقان. سول جىلى جەلتوقساندا ولار مۇسىلمانشا نەكە قيعان. الايدا رەسمي نەكەگە وتىرمادى.
سالتاناتتىڭ جاقىندارىنىڭ ايتۋىنشا, بيشىمباەۆ ونىڭ جۇمىس ىستەۋىنە تىيىم سالىپ, كىمدەرمەن ارالاساتىنىن باقىلاپ, تۋىستارىمەن, دوستارىمەن بايلانىسىن شەكتەگەن.
وقيعا بولعان كۇن
2023 جىلى 8 قاراشادا كەشكە ەرلى-زايىپتى ديما بيلاننىڭ استاناداعى كونتسەرتىنە بارعان. كونتسەرت كەزىندە ولاردىڭ اراسىندا جانجال شىعىپ, ولار كونتسەرت اياقتالماي جاتىپ, بيشىمباەۆتىڭ تۋىسىنا تيەسىلى Bau مەيرامحاناسىنا بارعان. وندا جانجال جالعاسىپ, فيزيكالىق كۇش كورسەتۋگە ۇلاسقان.
ءىس ماتەريالدارىنا سايكەس, بيشىمباەۆ نۇكەنوۆانى قورلاپ, سىيلىقتارىن جانە ساتىپ الىپ بەرگەن كيىمدەرىن ايتا باستاعان. بۇعان جاۋاپ رەتىندە سالتانات زەرگەرلىك بۇيىمدار مەن كيىمدەرىن شەشىپ تاستاپ, ىشكيىممەن قالعان, بۇل بيشىمباەۆتى ودان ءارى اشۋلاندىرعان.
بيشىمباەۆ نۇكەنوۆاعا بىلاپىت سوزدەر ايتىپ, باسىن, دەنەسىن جۇدىرىقتاعان. سالتانات دارەتحانادا تىعىلۋعا تىرىسقان, بىراق بيشىمباەۆ ەسىكتى قاعىپ, ارەكەتىن جالعاستىرعان. ءبىر كەزدە ونىڭ تاماعىنان ۇستاپ الىپ, تۇنشىقتىرا باستاعان, كەيىن نۇكەنوۆا ەسىنەن تانىپ قالعان. وسىدان كەيىن ول نۇكەنوۆانى VIP زالدىڭ ەدەنىنە جاتقىزىپ, ءوزى جانىنا ۇيىقتاپ قالعان. بەينەباقىلاۋ كامەرالارىنا تۇسىرىلگەن بۇل وقيعا ەكس-مينيسترگە قاتىستى سوتتا كورسەتىلدى.
2023 جىلى 9 قاراشادا تاڭەرتەڭ Bau مەيرامحاناسىنا جەدەل جاردەم شاقىرىلعان. بۇل كەزدە سالتانات نۇكەنوۆا قايتىس بولعان. ونىڭ دەنەسىنەن سوققى ىزدەرى تابىلدى.
كەيىن پوليتسيا كەلىپ, قۋاندىق بيشىمباەۆ كىسى ءولتىردى دەگەن كۇدىكپەن ۇستالدى. تەرگەۋ بارىسىندا ول تۋىسىنان بەينەباقىلاۋ كامەرالارىنداعى جازبالاردى ءوشىرىپ تاستاۋدى سۇراپ, قىلمىستىڭ ىزدەرىن جاسىرۋعا تىرىسقانى انىقتالدى.
سوت پروتسەسى
سالتانات نۇكەنوۆانىڭ ولىمىنە قاتىستى سوت پروتسەسى 2024 جىلى ناۋرىزدا باستالدى. بۇل وقيعا كوپشىلىكتىڭ نازارىن اۋداردى.
سوت وتىرىستارى تىكەلەي ەفيردە كورسەتىلدى, بۇل – قازاقستان ءۇشىن بۇرىن-سوندى بولماعان جاعداي. سوت بارىسىندا سالتانات نۇكەنوۆا سوققىعا جىعىلعان ساتتەر بەينەلەنگەن بەينەجازبالار ۇسىنىلدى.
مەديتسينالىق ساراپتامادا ءولىم مي جاراقاتىنىڭ سالدارىنان بولعانى انىقتالدى. قۋاندىق بيشىمباەۆ جۇبايىن كۇشتى ءدارى-دارمەكتەر مەن ىشىمدىك ءىشىپ, ءوزى قۇلاپ, جاراقات الدى دەپ, ءوز كىناسىن مويىندامادى.
الايدا ۇسىنىلعان دالەلدەر مەن ايعاقتار ناتيجەسىندە سوت پەن القابيلەر بيشىمباەۆتى كىنالى دەپ تاپتى.
سوت شەشىمى
2024 جىلى 13 مامىردا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ اسقان قاتىگەزدىكپەن كىسى ولتىرگەنى جانە ازاپتاعانى ءۇشىن 24 جىلعا باس بوستاندىعىنان ايىرىلدى.
ونىڭ تۋىسى باقىتجان بايجانوۆ قىلمىستى جاسىرعانى ءۇشىن 4 جىلعا باس بوستاندىعىنان ايىرىلدى.
