سالىق كودەكسىنىڭ جوباسىندا حالىقتى قىمباتشىلىققا ۇرىندىراتىن نورمالار بار

فوتو: اشىق دەرەككوز

دەپۋتات اسحات ايماعامبەتوۆ ماڭىزدى قۇجاتتى تالقىلاۋ بارىسىندا قىزۋ پىكىرتالاس ءوتىپ جاتقانىن مالىمدەدى. ماسەلە ومىرلىك ماڭىزى بار تاۋارلار مەن قىزمەتتەردىڭ قىمباتتاۋىنا اكەلەتىن نورمالاردا بولىپ تۇر, دەپ جازادى qandastar.kz atamekenbusiness_qaz-عا سىلتەمە جاساپ.

ماجىلىسمەن نەگىزگىلەرىن تىزبەلەپتى:

1. ءبىلىم. كورپوراتيۆتىك سالىقتى ەنگىزۋ جەكە مەنشىك ۋنيۆەرسيتەتتەردىڭ, مەكتەپتەر مەن بالاباقشالاردىڭ باعاسىنىڭ وسۋىنە اكەلۋى مۇمكىن. كاسىپكەر ءوز پايداسىن قايتسە دە ساقتاپ قالۋعا تىرىسادى, سوندىقتان جاڭا سالىق ەنگىزىلسە, ول قىزمەتتىڭ قۇنىن ءوسىرۋ ارقىلى شەشىمىن تابۋى ابدەن ىقتيمال.

2. ءدارى-دارمەكتەر. ءدارى-دارمەكتەر مەن ولاردىڭ وندىرىسىنە قاجەتتى ماتەريالداردى ققس (ندس) تولەۋدەن بوساتىلعان تاۋارلار تىزىمىنەن الىپ تاستاۋ ولاردىڭ قىمباتتاۋىنا الىپ كەلەدى. بۇل, اسىرەسە, تۇراقتى مەديتسينالىق قولداۋدى قاجەت ەتەتىن ازاماتتارعا اۋىر تيەدى. زەينەتكەرلەر مەن مۇگەدەكتىگى بار ازاماتتارعا بۇل قيىندىق تۋدىرۋى مۇمكىن.

3. مەديتسينالىق قىزمەتتەردىڭ قىمباتتاۋى. مەديتسينالىق قىزمەتتەرگە ققس ەنگىزۋ ولاردىڭ قىمباتتاۋىنا الىپ كەلۋى مۇمكىن.

«بۇل كودەكس قاراپايىم حالىققا قوسىمشا قارجىلىق جۇكتەمە اكەلمەۋى ءتيىس. سوندىقتان قاجەتتى تۇزەتۋلەردى ۇسىندىق”, – دەدى دەپۋتات.