سالىق پەن ايىپپۇل كولەمى ارتادى: قازاقستاندا 2026 جىلعا ارنالعان جاڭارتىلعان اەك مولشەرى اتالدى

فوتو: Stan.kz

قارجى مينيسترلىگى 2026–2028 جىلدارعا ارنالعان رەسپۋبليكالىق بيۋدجەت جوباسىن جاريالادى. قۇجات مينيسترلەر كابينەتىندە ماقۇلدانىپ, پارلامەنتكە جولداندى, دەپ جازدى qandastar.kz

وندا نەگىزگى الەۋمەتتىك كورسەتكىشتەر – زەينەتاقى, ەڭ تومەنگى كۇنكورىس دەڭگەيى جانە اەك كورسەتىلگەن. بۇل تۋرالى Stan.kz اقپارات اگەنتتىگى حابارلايدى.

قۇجاتقا سايكەس كەلەر جىلى نەگىزگى قارجىلىق كورسەتكىشتەر كەلەسىدەي بولادى:

– اەك (ايلىق ەسەپتىك كورسەتكىش) – 4 325 تەڭگە (2025 جىلى – 3 932 تەڭگە).

– ەڭ تومەنگى زەينەتاقى – 69 049 تەڭگە (2025 جىلى – 62 771 تەڭگە).

– بازالىق زەينەتاقى تولەمى – 35 596 تەڭگە (2025 جىلى – 32 360 تەڭگە).

– الەۋمەتتىك تولەمدەرگە ارنالعان ەڭ تومەنگى كۇنكورىس دەڭگەيى – 50 851 تەڭگە (2025 جىلى – 46 228 تەڭگە).

اەك-ءتىڭ ءوسۋى ايىپپۇلدار, مەملەكەتتىك باجدار مەن سالىقتاردىڭ مولشەرىنە تىكەلەي اسەر ەتەدى. سونىمەن قاتار الەۋمەتتىك تولەمدەر دە وسى كورسەتكىشتەرگە بايلانىستى كوبەيەدى.

قازىر بيۋدجەت جوباسى تالقىلاۋ ساتىسىندا: ونى 26 تامىزدا ۇكىمەت ماقۇلداپ, پارلامەنتكە جىبەردى. الداعى ۋاقىتتا ءماجىلىس پەن سەنات دەپۋتاتتارى قاراپ, تۇزەتۋلەر ەنگىزۋى مۇمكىن. دەگەنمەن نەگىزگى الەۋمەتتىك پارامەترلەر, ادەتتە, وزگەرىسسىز قالادى. بيۋدجەت تۋرالى زاڭ جىل سوڭىنا دەيىن قابىلدانىپ, پرەزيدەنت قول قويۋى ءتيىس. ول 2026 جىلعى 1 قاڭتاردان باستاپ كۇشىنە ەنەدى.

ۇكىمەت بولجامى بويىنشا, 2026 جىلى زەينەتاقى مەن جاردەماقى الۋشىلاردىڭ سانى شامامەن 300 مىڭ ادامعا ارتادى. ستۋدەنتتەردىڭ ستيپەندياسى كوتەرىلەدى, ال مەملەكەتتىك ءبىلىم گرانتتارىنىڭ سانى 19 مىڭعا كوبەيەدى. سونداي-اق مەملەكەت مىندەتتى الەۋمەتتىك مەديتسينالىق ساقتاندىرۋ جۇيەسىن قارجىلاندىرۋدى جالعاستىرادى.

ەسكە سالايىق, بۇعان دەيىن كەلەسى جىلى ەڭ تومەنگى جالاقى مولشەرى وزگەرىسسىز قالاتىنىتۋرالى جازعان ەدىك.