«Salyq tóleýden jaltarǵandar úshin»: Senatta qosymsha qun salyǵy boıynsha tirkeý shegin tómendetý usynyldy

Foto: pixabay.com

23 maýsymdaǵy senattyń keńeıtilgen otyrysynda jańa Salyq kodeksiniń jobasy qaraldy. Onda depýtattar qosylǵan qun salyǵy (QQS) boıynsha mindetti tirkeý shegin tómendetýdi usyndy, dep jazdy qandastar.kz

Bul týraly Stan.kz aqparat agenttigi habarlaıdy.

Komıtet tóraǵasy Sultanbek Mákejanov salyq-bıýdjet reformasy aıasynda usynylyp otyrǵan negizgi ózgeristerdi qamtıtyn qorytyndyny oqyp berdi.

«QQS boıynsha tirkeýge turý úshin shekti aınalym mólsherin 20 myń aılyq eseptik kórsetkishten (bıyl 78,6 mıllıon teńge) 10 myń aılyq eseptik kórsetkishke deıin (bıyl 39,3 mıllıon teńge) tómendetý usynylady», – dedi Mákejanov.

Komıtet ókilderi bul ózgeris bıznesti «droblenıe» (jasandy túrde birneshe zańdy tulǵaǵa bólý) arqyly qosymsha qun salyǵynan jaltarýmen kúresýge baǵyttalǵanyn atap ótti.

Jańa Salyq kodeksin talqylaý barysynda úkimet bul shekti 15 mıllıon teńgege deıin tómendetýdi usynǵan edi. Bul usynys bıznes qaýymdastyǵy men sarapshylar arasynda qyzý pikirtalas týdyrdy. Qarsy tarap bul qadam shaǵyn bıznestiń jumysyna kedergi keltirip, kóptegen kásipkerdi jalpy salyq rejımine ótýge májbúrleıtinin jáne qosymsha ákimshilik ári qarjylyq shyǵyndarǵa alyp keletinin aıtty.

Osylaısha depýtattar ymyraly sheshim qabyldap, jańa shekti 10 myń aılyq eseptik kórsetkish deńgeıinde belgileýdi usyndy. Bul ózgeris bıznesti bólshekteý máselesin sheshýge kómektesip qana qoımaı, shaǵyn jáne mıkrobıznestiń múddesin de eskerýge múmkindik beredi deıdi.

Usynylǵan Salyq kodeksine engiziletin ózgerister búgin Senatta birinshi oqylymda qaralyp jatyr. Eger zań jobasy maquldansa, ol ári qaraı jetildiriledi.

Eske salaıyq, buǵan deıin Salyq kodeksine baılanysty mıllıondaǵan qazaqstandyqtyń jalaqysy qaıta esepteletini týraly jazǵan edik. Memlekettik kirister komıtetiniń jańa shegerimine baılanysty býhgalterler mıllıondaǵan qazaqstandyqtyń jalaqysyn qaıta esepteýge májbúr bolady. Qazir Qazaqstanda bilim berý, medıına, ıpotekalyq turǵyn úı nesıeleri boıynsha syıaqy jáne kópbalaly otbasylarǵa 14 AEK kóleminde shegerim bar. Endi senatta qaralyp jatqan Salyq kodeksi olardyń kúshin joıýdy josparlap otyr, biraq standartty bazalyq shegerimdi qazirgi 14 AEK-ten aıyna 30 AEK-ke (jylyna 360 AEK) deıin ulǵaıtady. Eger kodeks qabyldansa, bul shegerim 2025 jyldyń 1 qańtarynan bastap ıaǵnı artqy kúnmen bekitilip qoldanylady.