Samokat tizgindeýshiler júrgizýshi me, álde júrginshi me

Elektr samokat, sıgveı, gıroskýter sııaqty qozǵalys quralyn paıdalanýshylar zańda jaıaý júrginshilerge teńestirilgen.

QR Ishki ister mınıstrligine qarasty ákimshilik polıııa komıtetiniń baspasóz hatshysy Irına Lýkıanına Facebook paraqshasynda elektr samokattardyń jaıaý júrginshilerge teńestirilgenin aıtty, dep habarlaıdy QazAqparat tilshisi.

Baspasóz hatshysynyń aıtýynsha, sıgveı, gıroskýter sııaqty qozǵalys quralyn paıdalanýshylar zańda jaıaý júrginshilerge teńestirilgen.

Olar tizgindegen qural kólikke jatpaıdy
Sondyqtan, ony paıdalanýshylar jaıaý júrginshi retindegi quqyqtaryn bilip, jol erejesin saqtaýǵa mindetti. Iaǵnı, arnaıy trotýarmen, jaıaý júrginshi jolymen júrýi qajet. Ol joq bolǵan jaǵdaıda joldyń jıegimen qozǵalýǵa mindetti», — dep jazdy Irına Lýkıanına.

Ol, sondaı-aq, atalmysh talapty saqtamaǵan samokat ıeleri eki aılyq eseptik kórsetkish kóleminde aıyppul arqalaýy múmkin ekenin aıtady.

«Ákimshilik quqyq buzýshylyq kodeksiniń 615-babynyń 1-bóligine sáıkes, jaıaý júrginshiler (velosıped jáne moped júrgizýshiler, osy sanatqa teńestirilgen ózge de jol qozǵalysyna qatysýshylar) jol qozǵalysynyń erejelerin saqtamaǵany úshin 2 AEK kóleminde aıyppul arqalaıdy», — dedi Irına Lýkıanına.

Ákimshilik polıııa komıtetiniń ókili mopedke teńestirilgen qozǵalys quraldaryn 16-ǵa tolǵan tulǵalar ǵana paıdalana alatynyn eskertedi.

«Bul sanattaǵy jol qozǵalysyna qatysýshylar jol jıegimen qozǵala alady. Tek ol úshin ózgelerge kedergi keltirmeýi kerek. Eger kedergi keltiretindeı jaǵdaı bolsa, qozǵalys quralynan túsip, jaıaý júrýi shart. Jol qozǵalysynyń 24-bóliminde bul týraly tolyq aıtylǵan. Moped pen elektr samokat tizgindeýshiler velosıped jolaǵymen júrýge mindetti. Ol joq bolǵan jaǵdaıda negizgi joldyń oń jaq jıegimen, marshrýttyq kólikterge arnalǵan jolaqtarmen júrýi tıis», — delingen jazbada.

Komıtet ókiliniń jazbasyna súıensek, elektr samokatpen júrý kezinde kelesi áreketterge tyıym salynady:

• tizgindi eki qolmen ustamaı júrý;
• ózgelerdi mingestirý;
• uzyndyǵy 15 santımetrden asatyn, ózgelerdiń qozǵalysyna kedergi keltiretin pishindegi júk tasymaldaý;
• velosıped joly bola tura, negizgi jolǵa túsý;
• tramvaı qozǵalysy bar nemese bir baǵytta birneshe jolaǵy bar joldarda solǵa nemese keri burylý;
• tirkeme jalǵaý.

«Eger atalmysh sanattaǵy jolaýshy jol erejesinen tys áreketteri saldarynan ózgelerdiń densaýlyǵyna qylmystyq sıpaty joq zardap tıgizse, aıyppul mólsheri eki aılyq eseptik kórsetkishten 10 aılyq eseptik kórsetkishke deıin ósedi. Qoldanystaǵy zańnamada atalmysh sanattaǵy jol qozǵalysyna qatysýshylardyń arnaıy kıimdermen jaraqtalýyna qatysty reglament joq», — dep jazdy Irına Lýkıanına.