جاڭالىقتار
«ساپ-ساۋ بولىپ تۋىلدى»: قىزىلوردادا 5 كۇننەن كەيىن شەتىنەپ كەتكەن ءسابيدىڭ اتا-اناسى بالانىڭ ولىمىنە دارىگەرلەردى كىنالايدى
قىزىلوردادا ءسابي ومىرگە كەلىپ, بەس كۇننەن كەيىن شەتىنەپ كەتتى. تۋعاندا دەنساۋلىعى جاقسى دەپ سەندىرگەن دارىگەرلەر ساراپتاما ناتيجەسى بالانىڭ ميىندا ىسىك بارىن كورسەتكەنىن ايتتى. ۇلىنان ايىرىلعان اتا-انا بولعان جاعدايعا دارىگەرلەر كىنالى دەپ سانايدى, دەپ حابارلايدى qandastar.kz ينفورمبيۋرو-عا سىلتەمە جاساپ.
ەرلى-زايىپتى داۋلەت پەن ايگۇل ءبىر اي بۇرىن ۇلدى بولدىق دەپ قۋانىپ, جاقىندارىنان ءسۇيىنشى سۇراعان. ومىرگە كەلگەن نارەستەگە بايجان دەگەن ەسىم قويىپ ۇلگەرىپتى. الايدا نەبارى بەس كۇن جارىق دۇنيەنى كورگەن شاقالاق شەتىنەپ كەتكەن.
ايەل ۇلىن كەسار تىلىگى ارقىلى دۇنيەگە اكەلگەن. الايدا دارىگەرلەر بالانىڭ جاتىردا وكپەسى قىسىلىپ قالعانىن ايتتى دەپ وتىر. ال بەس كۇن وتكەندە ءسابيدىڭ دەنساۋلىعى كۇرت ناشارلاپ, جانساقتاۋ بولىمىندە جان تاپسىرعان. ال ساراپتاما قورتىندىسىندا بالانىڭ شەتىنەپ كەتۋىنە ميىنداعى ىسىك سەبەپ بولعانى جازىلعان. ەرلى-زايىپتى بۇرىن-سوڭدى بايقالماعان سىرقات دارىگەرلەردىڭ سالعىرتتىعىنان پايدا بولۋى مۇمكىن دەپ كۇدىكتەنەدى.
“كيىندىرىپ جاتقان كەزدە مە, الدە بىلايىنشا ۋاقىتتاردا ما قاتتى ءبىر جەرگە قويىپ قالدى باسىن. بولماسا ۇرىپ الدى. ايتپەسە ىسىك قايدان پايدا بولادى? ساپ-ساۋ بالا, ول قالاي كەتىپ قالادى دەپ ەدىم. نەدەن بولىپ جاتقانىن ءبىز دە تۇسىنبەدىك دەپ وتىر”, – دەيدى ايگۇل.
ال قىزىلورداداعى “انا مەن بالا” ورتالىعىنداعى دارىگەرلەردىڭ ءوز شىندىعى بار. ولاردىڭ ايتۋىنشا, بالانىڭ دەنساۋلىعىندا قۇرساقتا جاتقاندا بىتكەن اقاۋى بولعان.
“ۇزاق قۇرساق ىشىلىك گەپوكسيا نەگىزىندە باس مي يشەمياسى دياگنوزى قويىلىپ, جانساقتاۋ بولىمىندە نارەستە ەم الدى. بۇل وتتەگى جەتىسپەۋشىلىگى عوي. سونىڭ نەگىزىندە پوليورگاندى جەتىسپەۋشىلىك باس مي ىسىنۋىنەن ەم-دومعا قاراماستان نارەستەنىڭ اعزاسىندا قايتىمسىز پروتسەستەر بولۋى نەگىزىنەن بالا 11 ناۋرىز كۇنى شەتىنەپ كەتتى”, – دەيدى قىزىلوردا وبلىستىق انا مەن بالا پەريناتالدىق ورتالىعى باس دارىگەرىنىڭ ورىنباسارى ساۋلە جاقانوۆا.
دارىگەرلەر نارەستەنى امان الىپ قالۋ ءۇشىن قولىمىزدان كەلگەنىن جاسادىق دەپ اقتالىپ الەك. الايدا ەرلىزايىپتى ولاردىڭ سوزىنە سەنۋدەن باس تارتتى. سول سەبەپتى قۇزىرلى ورگاندارعا دارىگەرلەردىڭ ۇستىنەن شاعىم تۇسىرمەك.
