ساپار ىسقاقوۆ: قىپشاقتار مەن ولاردىڭ بابالارى تاريحتا ەلەۋسىز قالعان

فوتو: سكرين

ساپار ىسقاقوۆ, بەلگىلى جيھانگەر, قۇرىلىسشى جانە مەتسەنات, «Qasqa jol» پودكاستىندا قازاق تاريحى مەن ءتۋريزمىن تالقىلاي وتىرىپ, بىرقاتار ماڭىزدى ماسەلەلەرگە توقتالدى. ول قازاق حالقىنىڭ تاريحي تۇلعالارى مەن حاندارى تۋرالى ءوز پىكىرىن ءبىلدىردى, دەپ جازادى qandastar.kz

“نەگە ءبىز ءوزىمىزدىڭ مىقتى حاندارىمىزدى, بابالارىمىزدى بىلە بەرمەيمىز? شىڭعىسحاننىڭ ماقساتى باسقا ەلدەردى جاۋلاپ الۋ بولدى, ول ءوز جولىندا قانشاما حالىقتاردى ورتەۋ, جويۋ, قۇلدىققا الۋ سياقتى ارەكەتتەر جاسادى. سول قۇلدىققا الىنعانداردىڭ ءبىرى سۇلتان بەيبارىس پەن قالاۋىن ەدى. ولار كەيىن بيلىككە كەلگەن جانە تاريحتا وزىندىك ءىز قالدىرعان تۇلعالار. ال ءبىز شىڭعىسحاندى بابامىز دەپ سانايمىز. بىراق ول ءوز زامانىندا قازاقتاردى قارا سۇيەك دەپ ەسەپتەگەن. حان بولۋ ءۇشىن شىڭعىسحاننىڭ تۇقىمىنان بولۋ كەرەك, ال تورەلەر —  قازاقتىڭ شەجىرەسىنە كىرمەيتىن توپ. سوندا قالاي شىڭعىسحان بىزگە بابا بولا الادى?», — دەدى ساپار ىسقاقوۆ.

ول سونىمەن قاتار قازاقتىڭ تاريحي حاندارىمەن ماقتانۋىمىز كەرەكتىگىن دە ايتتى. مىسالى, تۇعىرىل حان تۋرالى ءسوز قوزعاپ, ونىڭ سۇيەگىنىڭ كيەۆتەگى مۋزەيدە ساقتاۋلى تۇرعانىن ايتىپ, بۇل تاريحي مۇرانى ەلگە قايتارۋ ءۇشىن بىرنەشە رەت ۇكىمەتكە ءوتىنىش جاساعانىن جەتكىزدى. بىراق, ول بۇل باستامانىڭ ىسكە اسپايتىنىن تىلگە تيەك ەتتى.

“سۇلتان بەيبارىس جانە قالاۋىن سياقتى تۇلعالارمەن ماقتانۋعا بولادى. سۇلتان بەيبارىس اراب ەلدەرىن موڭعول شاپقىنشىلىعىنان قۇتقارعان. ال قالاۋىن جايلى كوپ ادام بىلمەيدى, بىراق ول دا وتە مىقتى تۇلعا بولدى”, — دەپ اتاپ ءوتتى ساپار ىسقاقوۆ.

ساپار ىسقاقوۆ قابدەش ءجۇمادىلوۆتىڭ شىڭعىسحاندى قازاقتىڭ باباسى دەپ ساناۋىنا قارسى پىكىر ءبىلدىردى. ونىڭ ايتۋىنشا, قازاق حالقىنىڭ قالىپتاسۋى مەن رۋلاردىڭ بىرىككەن كەزدە تورەلەردىڭ ءرولى بولمايدى, سول سەبەپتى بۇل تۇجىرىم دالەلدەنبەگەن.

قورىتىندىسىندا, ول قازاق حالقىنىڭ ءوز تاريحىن تەرەڭىرەك زەرتتەپ, ونى الەمگە تانىتۋ قاجەتتىگىن اتاپ ءوتتى.