Sara Nazarbaeva qurǵan «Bóbektiń» aınalasynda ne bolyp jatyr?

Foto Orda.kz

Kúni keshe Sara Nazarbaeva ashqan «Bóbek» ortalyǵy qaıta qurylady degen sybys tarady, – dep jazady Qandastar.kz.

Insaıdtarda taraǵandaı, ortalyq endi respýblıkalyq memlekettik kásiporyn retinde qurylýy múmkin. Kezinde Almatyda bul ortalyqtyń eki alańy bolǵan kórinedi. Alaıda bir jer telimin birneshe jyl buryn «alyp qoıǵan». Buǵan deıin bul jerde «О́zin-ózi taný» Adamnyń úılesimdi damýy gýmanıtarlyq kolledji jáne «Bóbek» oqý-saýyqtyrý kesheni jumys istegen. «Bóbekte» jyl saıyn ózge óńirlerdiń oqýshylary úshin jazǵy demalys lageri uıymdastyrylyp kelgen.

Alaıda 2021 jyly bul aýmaq kúrdeli jóndeledi degen resmı málimdemeden soń tolyq jabyldy. Al kolledj basqa meken-jaıǵa aýysqan.

Osydan keıin bul jer «Bóbekke» qaıtarylmaıdy, ol Abaı atyndaǵy respýblıkalyq mamandandyrylǵan mektep-ınternatyna beriledi degen aqparat tarady. Sondaı-aq, ekinshi jer telimine turǵyn úı kesheni, bıznes ortalyǵy, saýda ortalyǵy nemese kottedj qalashyǵy salynady degen qaýeset shyqty. Sondyqtan qazir «Bóbek» gımnazııasynyń ata-analary alańdaýshylyq tanytyp, ınklıýzıvti mekemeniń qaıta qurylýyn talap etip otyr.

Odan beri úsh jyl ótkeni máseleni kúrdelendirdi. Bul týraly Bilim mınıstrliginiń bergen resmı jaýaby mynadaı: «nysan jańa bilim keńistigine aınalady».

Al Almaty ákimshiligi usynǵan aqparatta bas jospar boıynsha bul jerde Ulttyq shyǵarmashylyq mektep salynýy tıistigi aıtylady. Búginde qurylys qaldyqtaryn tazalaý jumystary júrgizilýde.

Eske salaıyq, ortalyq 1997 jyly Sara Nazarbaevanyń bastamasymen «respýblıkalyq balalar saýyqtyrý-ońaltý ortalyǵy» bolyp qurylǵan. Al adamnyń úılesimdi damýynyń «О́zin-ózi taný» gýmanıtarlyq kolledji 2009 jyly negizi qalanǵan. Osy jyly «О́zin-ózi taný» páni mindetti mektep baǵdarlamasyna endi.

Bul pán boıynsha mamandar «Bóbek» ortalyǵyndaǵy «О́zin-ózi taný» kolledjinde oqytylyp, oqýlyqtar men oqý-ádistemelik quraldaryn adamnyń úılesimdi damýy Ulttyq ınstıtýtynyń mamandary ázirlep otyrdy. Bul úshin bıýdjetten jyl saıyn júzdegen mıllıon qarjy bólingen.

2021 jyly kolledj alańyn jóndeý jumystaryna japty. Kolledj basqa meken-jaıǵa kóshirildi. Al 2022 jyldyń qyrkúıeginen bastap «О́zin-ózi taný» pánin mindetti mektep baǵdarlamasynan alynyp tastaldy.

Taǵy bir eskerer tus, ekinshi ǵımarat súrilmegen. Onda qazir «О́rken» balalardy qorǵaý ulttyq ǵylymı-praktıkalyq ınstıtýty jumys júrgizýde.

Aıta ketý kerek, Oqý-aǵartý mınıstrliginiń «Bóbek» ulttyq ǵylymı-praktıkalyq, bilim berý jáne saýyqtyrý ortalyǵy» respýblıkalyq memlekettik qazynalyq kásipornyn qaıta uıymdastyrý týraly» Úkimet qaýlysynyń jobasy jarııalanǵan. Qaýly boıynsha atalǵae ortalyq endi Úzdiksiz ınklıýzıvti bilim berýdiń ulttyq ǵylymı-praktıkalyq ortalyǵy retinde atalady.